धरान ।श्री पब्लिक हाइ स्कूल, धरानमा इलाका प्रहरी कार्यालय, धरानद्वारा आयोजित १६ दिने लैङ्गिक हिंसा विरुद्धको अभियान अन्तर्गत साइवर अपराध तथा बालविवाह रोकथाम तथा नियन्त्रण सम्बन्धी सचेतना कार्यक्रम सम्पन्न भएको छ ।
विहीबार विद्यालयको सभाहलमा आयोजित यस कार्यक्रमको सहजिकरण प्रहरी निरिक्षक कोमल ठाकुरले गर्नु भएको थियो। कार्यक्रम नेपाल प्रहरी, स्थानीय तह, समुदाय, सामाजिक संस्था, र विद्यालयको साझेदारीमा सञ्चालन गरिएको थियो।
कार्यक्रममा इलाका प्रहरी कार्यालय, धरानका प्रमुख प्रकाश जवेगुले भने, “लैङ्गिक हिंसा अन्त्य गर्ने प्रतिवद्धता र समाजका सबै तहमा ऐक्यवद्धता निम्त्याउने उद्देश्यले नेपाल सरकारको कार्यक्रम अन्तरगत यस प्रकारका सचेतना अभियानहरू सञ्चालन गरिएका छन्।”
प्रधानाध्यापक डा। इन्द्रमोहनले विद्यालयको वार्षिक योजनाअनुसार विभिन्न संघसंस्था र निकायसँग सहकार्य गरेर सचेतना कार्यक्रमहरू सञ्चालन गर्दै आएको जानकारी दिए ।
कार्यक्रममा विद्यालयका इन्चार्ज विरेन्द्र बहादुर साहले भने, “यसरी आयोजना गरिएका गतिविधिहरूले विद्यार्थीहरूको पढाइप्रति रुचि बढाउने कार्यमा पनि सहयोग पुर्याउँछन्।”
साइन्स र इलेक्ट्रिकल विभागका इन्चार्ज मोहन श्रेष्ठले कार्यक्रमका विषयवस्तुका बारेमा प्रतिक्रिया व्यक्त गर्दै भने, “कक्षा ९ र १० का विद्यार्थीहरूलाई यौवनाअवस्थाबाट उत्पन्न हुने यौनजन्य हिंसाबारे सचेत गराइएको छ, जसले कार्यक्रमलाई अझ प्रभावकारी बनाउन लैङ्गिक हिंसा सहित साइवर अपराधको बारेमा पनि सचेतना गरिएकाले कार्यक्रम प्रभावकारी भएको ।”
कार्यक्रममा कक्षा ९ र १० का १०३ जना विद्यार्थीहरूको सहभागिता रहेको थियो।
