धरान हेल्पिङ ह्यान्ड्समा किरण " शैक्षिक क्षेत्रको विकासमा ध्यान केन्द्रित गर्ने योजना "

धरान/ धरान हेल्पिङ ह्यान्ड्सको शनिबार सम्पन्न चौथो साधारणसभाले किरण भुजेलको अध्यक्षतामा नौ सदस्यीय नयाँ कार्यसमिति चयन गरेको छ ।
नवगठित कार्यसमितिका उपाध्यक्ष, सचिव, सहसचिव, कोषाध्यक्ष र सहकोषाध्यक्षमा क्रमशः विद्या शाक्य, रमेश राई (रोमु), मणि लिम्बू, कोपिला राई र नर्वदा गुरुङ छानिएका छन् ।

यसैगरी नवगठित कार्यसमितिका सदस्यहरूमा विशाल थापा, शैलेस दाहाल र जोलिस गुरुङ छानिएका छन् ।
दुबईमा रहेका धरानेहरूको सहयोगबाट सञ्चालन भइरहेको धरान हेल्पिङ ह्यान्ड्सले आगामी दिनमा धरानको शैक्षिक क्षेत्रको विकासमा ध्यान केन्द्रित गर्ने संस्थाका संरक्षक ईश्वर श्रेष्ठले बताए ।

आर्थिक अभावका कारण शिक्षाबाट वञ्चित बालबालिकाहरूलाई संस्थाले सक्दो आर्थिक सहयोग गर्ने उनको भनाइ छ । नवनिर्वाचित अध्यक्ष भुजेलले पनि संस्थाको उद्देश्यअनुसार धरानको सामाजिक क्षेत्रमा क्रियाशील हुने बताउँदै यसका लागि वार्षिक कार्ययोजना बनाइने जनाए ।
संस्थाका संरक्षक श्रेष्ठ र पूर्व सदस्य राजु राईको उपस्थितिमा सम्पन्न साधारणसभामा उपाध्यक्ष विद्या शाक्यले स्वागत मन्तव्य राखेकी थिइन् भने कोषाध्यक्ष रमेश राईले संस्थाको आर्थिक विवरण प्रस्तुत गरेका थिए ।