राष्ट्रिय परिचयपत्र,घर जग्गा किनबेच गर्दा अनिवार्य

काठमाण्डौ/ अबदेखि घरजग्गाको कारोबार गर्नको लागि सरकारले राष्ट्रिय परिचयपत्र अनिवार्य गरेको छ।

गृह मन्त्रालयले राजपत्रमा सूचना प्रकाशित गर्दै परिचय पत्र अनिवार्य गरेको हो । उक्त नियम अब माघ १ गतेदेखि घरजग्गा किनबेचमा पनि राष्ट्रिय परिचयपत्र अनिवार्य लागु हुने छ । अहिले क्रेता र विक्रेताको नागरिकताबाट घरजग्गाको लिखत पास हुँदै आएको छ।

राष्ट्रिय परिचयपत्रलाई सबै निकायतिर कार्यान्वयनमा ल्याउने उद्देश्य अनुसार घरजग्गा किनबेचमा पनि राष्ट्रिय परिचयपत्र अनिवार्य गरिएको गृह मन्त्रालयका सहसचिव एवं प्रवक्ता नारायणप्रसाद भट्टराईले बताए।

“सरकारले राष्ट्रिय परिचयपत्र तथा पञ्जीकरण ऐन, २०७६ को दफा ३ र १० को प्रयोजनका लागि राष्ट्रिय परिचयपत्रको प्रयोग सम्बन्धमा गरेका निर्णय समेटेर गृह मन्त्रालयले राजपत्रमा सार्वजनिक सूचना प्रकाशन गरेको छ, अब घरजग्गा किनबेचमा पनि राष्ट्रिय परिचयपत्र अनिवार्य पेस गर्नुपर्नेछ,”

भट्टराईले भने। त्यस्तै, माघदेखि ब्यांकिङ तथा वित्तीय सेवा, सामाजिक सुरक्षा कोष र घरजग्गा किनबेच सम्बन्धी सेवाका लागि पनि राष्ट्रिय परिचपयत्र अनिवार्य गरिने भएको छ।

विभिन्न जिल्लामा लागू हुने गरी सामाजिक सुरक्षा, स्वास्थ्य बीमा, निवृत्तिभरण, राजस्व (व्यक्तिगत आयकर दर्ता), सवारी चालक अनुमतिपत्र, कम्पनी दर्ता तथा नवीकरण सम्बन्धी सेवा प्राप्त गर्न आगामी साउन १ गतेदेखि नै राष्ट्रिय परिचयपत्र अनिवार्य गरिएको मन्त्रालयका प्रवक्ता भट्टराईले बताए।

उनका अनुसार आगामी माघ १ गतेदेखि सिमकार्ड लिन पनि राष्ट्रिय परिचयपत्र अनिवार्य पेश गर्नुपर्नेछ।

सरकारी निकाय, संस्था तथा निजी क्षेत्रबाट प्रवाह गरिने सार्वजनिक सेवासुविधा प्राप्त गर्न अब नागरिकता प्रमाणपत्रको सट्टा राष्ट्रिय परिचयपत्र वा राष्ट्रिय परिचय नम्बर पेश गर्नुपर्ने व्यवस्था गरिएको छ।