धरान / धनकुटाको निशानदेवी भगवती मन्दिर परिसरमा निर्माण भएको अठारौँ शताब्दीको प्रवेशद्वार, ढुंगेधारा र तोपको पुनर्निर्माण गरिएको छ ।
अठारौँ शताब्दीको इतिहासलाई जीवित गर्ने लक्ष्यले प्रवेशद्वार, ढुंगेधारा र २ वटा तोप पुनर्निर्माण गरिएको जनाइएको छ ।
२ सय ४७ वर्षअघि स्थापित निशान भगवतीको मन्दिर परिसरको प्रवेशद्वार, ढुंगेधारा र तोप सरस्वती पूजाको अवसर पारेर पूर्वी पृतनापति उपरथी सहदेव खड्काले उद्घाटन गरेका छन् ।
विशेषगरी मन्दिरमा निर्मित ३ वटा पुरानो शैलीका ढुङ्गेधारा मन्दिरको प्रवेशद्वारभन्दा भित्र रहेका छन् ।
मन्दिरमा रहेको जंगी निशान गण, श्रीजंग गण र इन्द्रध्वज गणको निशानको नाममा छुट्टाछुट्टै ढुंगेधारा निर्माण गरिएको मन्दिर व्यवस्थापन समितिका महासचिव जनार्दन गोठालेले बताए ।
धारा वि.सं. २०५२ सालमा धनकुटा–हिले लोकमार्ग निर्माण गर्ने क्रममा धनकुटाको जिरोप्वाइन्टमा रहेको ओढार भेटिएको थियो ।
सोही ओढारभित्र भेटिएको ढुंगेधारालाई निशान मन्दिरमा स्थापना गर्न लागिएको निर्माण समितिका सचिव गोठालेले बताए । धारा संरक्षण र सुरक्षाको कारणले तत्कालीन प्रदेश संग्रहालय धनकुटामा राखिएको थियो ।
धारा सर्वसाधारणका लागि निशान मन्दिरको बाहिरी भागमा खुला राखिएको छ । प्रवेशद्वार, ढुंगेधारा र २ थान तोप नेपाली सेनाको क्युआइपी कार्यक्रमअन्तर्गत विनियोजित बजेटबाट भीमदल गण धनकुटाले गत भदौ ३० गतेबाट पुनर्निर्माण गरेको थियो । १५ लाख ५९ हजारको लागतमा पुरातात्विक शैलीको प्रवेशद्वार तथा ढुंगेधारा र तोप निर्माण सम्पन्न गरिएको हो ।
