_1693980289.gif "#")
मोरङ / नवनियुक्त अर्थमन्त्री विष्णु पौडेले व्यवसायीका विषयमा छलफल गर्न वार्तामा बोलाएपछि निरन्तर आन्दोलन गर्दै आएका उद्योगी व्यवसायीहरुले हाललाई आन्दोलन स्थगित गरेका छन् ।
अर्थमन्त्री पौडेलले सोमबार नै उद्योगी व्यावसायीलाई वार्तामा बोलाएपछि आन्दोलन स्थगित भएको मोरङ व्यापार संघका अध्यक्ष नविन रिजालले जानकारी दिए ।
उनले भने–‘नवनियुक्त अर्थमन्त्री ज्यूले वार्तामा बोलाउनु भएको छ, समस्या समाधान हुने अपेक्षा हामीले राखेका छौंं, वार्तामा बोलाएपछि हामीले हाललाई आन्दोलन स्थगित गरेका हौंै ।’ उनले वार्तामा बोलाएसँगै सरकारले माग सम्बोधन गर्ने आश देखाएको बताए । उनले भने–‘हामी वार्तामा बस्छौं, हाम्रो मागको सम्बोधन नभए हामी पुनः सडक संघर्षमा उत्रिन्छौं ।’
अर्थमन्त्रीसँगको वार्ताका लागि मंगलबार नै टोली काठमाडौँ गएको बताए । उनका अनुसार वार्ता टोलीमा सहभागी हुन विराटनगरबाट ६ जनाको टोली गएका छन् । । वार्ता टोलीमा भैरहवा, बुटवल, नेपालगन्ज र काठमाडौँ उद्योग वार्णिज्य संघका प्रतिनिधि पनि सहभागी रहेको अध्यक्ष रिजलाले जानकारी दिए ।
उद्योगी व्यवसायीहरुले बैंकको चर्को ब्याजदरविरुद्ध पुस ७ गतेदेखि नेपाल राष्ट्र बैंक प्रादेशिक कार्यालय विराटनगरको गेट अगाडि धर्ना दिँदै आइरहेका छन् ।
