धरान । नेपालकै चर्चित गायक स्व. खेमराज गुरुङको स्मृतिमा सञ्चालन भएको खेमरामा गुरुङ ट्रष्टले स्व. गायक गुरुङको स्मृतिमा नेपालका संगीतका दुई सर्जक दीप श्रेष्ठ र गायक भविन ढुंगानालाई सम्मान एवम् पुरस्कृत गरेको हो ।
संखुवासभाको खाँदबारीमा ट्रष्टको कार्यालयमा आयोजित एक कार्यक्रमबीच
ट्रष्टले यो वर्षको स्रष्टा सम्मान वरिष्ठ संगीतकर्मी श्रेष्ठलाई र प्रतिभा पुरस्कार गायक ढुंगानालाई प्रदान गरेको हो ।
२०२५ साल पुस ३ गते रेडियो नेपालमा ‘म पत्थरको देवता होइन’ बोलको गीत रेकर्ड गरेर औपचारिक रूपमा गीत‚ संगीतको क्षेत्रमा उदाएका श्रेष्ठको पाँच सयभन्दा बढी गीत रेकर्ड भएका छन् भने लोकप्रिय टेलिभिजन गायन रियालिटी शो ‘भ्वाइस अफ नेपाल’को निर्णायक समेत भइसकेका श्रेष्ठलाई ट्रष्टले ५० हजार रुपैयाँको राशिसहित सम्मानपत्र प्रदान गरेको हो ।
यसअघि वरिष्ठ गीतकार रत्नसम्शेर थापा (२०७४), वरिष्ठ संगीतकार प्रकाश गुरुङ (२०७५), वरिष्ठ जनपक्षीय गायक रामेश (२०७६)लाई स्रष्टा समान पुरस्कार प्रदान गरिएको थियो ।
यसैगरी नेपाल टेलिभिजनबाट प्रशारण भएको गायन रियालिटी शो ‘नेपाली तारा’को पहिलो सिजनको उत्कृष्ट चारमा पर्न सफल ढुंगाना पछिल्लो समय लोकप्रिय टेलिभिजन गायन रियालिटी शो ‘भ्वाइस अफ नेपाल’को कोच दीप श्रेष्ठको संगीत सल्लाहकार थिए । दर्जनौँ गीतका स्वर र संगीत भरेका ढुंगाना त्रिभुवन विश्वविद्यालय ललितकला क्याम्पसका संगीत शिक्षकसमेत हुन् । उनलाई प्रतिभा पुरस्कारवापत २० हजार प्रदान गरिएको थियो ।
यसअघि प्रतिभा पुरस्कार मेलिना राई (२०७४), ओमप्रकाश राई (२०७५) र सुसन लामा (२०७६)लाई प्रदान गरिएको थियो। २०७७ र २०७८ सालको सम्मान तथा पुरस्कार वितरण कार्यक्रम भने कोभिड–१९ महामारीका कारण स्थगित गरिएको थियो ।