धरान । पहिचानवादीहरुले पहिचानको आधारमा प्रदेश नं. १ को नामाकरणको माग राख्दै आन्दोलन चर्काइरहेको बेला संयुक्त खस क्षेत्री नेपाल १ नम्बर प्रदेश समितिले प्रदेश एकको नाम सगरमाथा राख्नुपर्ने मागलाई अगाडि सारेका छन् ।
बुधबार उनीहरुले प्रदेश एकको नाम सगरमाथा हुनुपर्ने मागसहित मुख्यमन्त्री राजेन्द्रकुमार राईलाई ज्ञापनपत्र बुझाएका छन् ।
उनीहरुले ज्ञापनपत्रमा प्रदेश १ मा विभिन्न जातजातिको बसोबास भएकोले इतिहासमा भेटिने, इतिहास बोल्ने जातिको जनसंख्या कम भएकाले जातिको आधारबाट नामकरण हुँदा सबैलाई समेट्न नसकिने भएकनोले सगरमाथा नाम उपयुक्त हुने जनाएका छन् । लोकतन्त्रमा निर्वाचनको परिणामलाई स्विकारे जस्तै बहुमतको कदर गर्नुपर्ने बताउँदै उनीहरूले विरोधका लागि विरोध धेरै हुने र ठूलो स्वर गर्नेको कुरा सुन्ने प्रथाको अन्त्य गर्नुपर्नेमा जोड दिएका छन ्।
द्वन्द्व निम्त्याउन सक्ने र स्थायी विवाद ल्याउन सक्ने नाम नराख्न आग्रह गर्दै उनीहरूले कतैबाट नियमसंगत ढंगबाट कार्यसम्पादनमा बेथिति गरिए संयुक्त खस क्षेत्री नेपाल विरोधको आवाज बुलन्द बनाउने विज्ञप्तीमार्फत चेतावनी समेत दिएका छन् ।
मुख्यमन्त्री राईले प्रदेशको नाम राख्न नसकेको भन्दै प्रदेश खारेजीको समेत चर्चा भएको बताउँदै यस्ता संवेदनशील विषयमा हतार गर्नुभन्दा समय लिएर टुंगो लगाउनु राम्रो हुने उनीहरुले सुझाव दिएका छन् ।