_1693980289.gif "#")
धरान । नेपाल कृषि प्रधान देश हो । कृषिका लागि सरकारले अरबौ खरबौ बजेट छुट्याएको छ तर यही कृषिप्रधान देश नेपालमा छिमेकी मुलुक भारतको भर पर्नुपर्ने अवस्था देखिएको छ ।
यसको उदाहरण पूर्वी नाका काँकडभिट्टाबाट कृषिजन्य वस्तु निर्यातभन्दा आयात बढी भएको क्वारेन्टिन कार्यालय तथ्यांकमा पाइएको छ ।
आर्थिक बर्ष २०७८÷०७९ लाई हेर्ने हो भने काँकडभिट्टा नाका भएर कृषि सामाग्री निर्यात भन्दा आयात बढी देखिएको छ । यो आर्थिक बर्षमा एक अर्ब रुपैया भन्दा बढीको कृषि सामाग्री भारत तथा तेस्रो मुलुकबाट आयात भएको तथ्यांक क्वारेन्टाइन कार्यालयसँग रहेको छ ।
कार्यालयका अनुसार आर्थिक वर्ष २०७८÷ ७९ मा यो नाका भएर ८ अर्ब ३५ करोड ६५ लाख ८७ हजार रुपैयाँ बराबरको कृषिजन्य सामग्री नेपालबाट भारतलगायत तेस्रो मुलक निर्यात भएको छ भने सोही अवधिमा भारतलगायत अन्य मुलुकबाट ९ अर्ब ४ करोड ९० लाख ६३ हजार रुपैयाँको सामग्री आयात भएको छ ।
कार्यालयका बाली संरक्षण अधिकृत दविन्द्र साहुका अनुसार चामल, धानलगायतका खाद्य सामग्री, चना, भटमासलगायतका तेलहन, करेला, भान्टालगायत ताजा तरकारी, ताजा फलफूल, इण्डोनेशियन सुपारीलगायत मसलाजन्य सामग्री आयात भएको छ । उनले भने–‘ यही अवधिमा ताजा तरकारी, सुगनकोकिला, दालचिनी लगायतका जडीबुटी, मुसुरो दाल, चिया, अदुवा, अलैँची, वनलसुन, तोरीको पिना, अम्रिसो, चामल गरी जम्मा ८ अर्ब ३५ करोड ६५ लाख ८७ हजार रुपैयाँ बराबरको सामान निर्यात भएको देखिन्छ ।’
