‘एकतर्फी पार्किङले सिटीसफारी विस्थापित ’

धरान । एकतर्फी पार्किङको नाममा सिटी सफारीलाई विस्थापित गर्न खोजेको भन्दै सिटीसफारी चालकहरुले आइतबार धरान उपमहानगरपालिकाको ध्यानाकर्षण गराएका छन् ।

नेकपा माओवादी केन्द्र सम्बद्ध मजदुरहरुको संगठन अखिल नेपाल यातायात मजदुर सगठनको एक नम्बर प्रदेशका अध्यक्ष एवम केन्द्रीय महासचिव लिलाबहादुर प्रधानको नेतृत्वमा नगरपालिका पुगेका हुन् ।

उनीहरुले उपमहानगरपालिका गेट अगाडि सिटीसफारी राखेर धर्ना समेत दिएका थिए । नेता प्रधानले उपमहानगरपालिकालाई ध्यानाकर्षण गराउदै भने–‘एकतर्फी पार्किङको नाममा मोटरसाइकल लगायतका अन्य सवारी साधनलाई व्यवस्थित गरिरहँदा सिटी सफारीको स्थान कहाँ हो भन्ने एकिन नगरिदा विस्थापित हुने अवस्थामा पुगेका छौ । हामीले विगतदेखि नै पार्किङ गर्दै गरेको ठाउँलाई यथावत गर्नुपर्छ भन्ने हाम्रो मान्यता हो ।’

उनले मेयर हर्क साम्पाङले यस विषयमा साउन ५गतेसम्म सिटीसवारीलाई विगतकै यथावत स्थानमा राखेर पार्किङ गर्ने र ५ गते यातायात व्यवसायी, राजनीतिक दलहरुसँग छलफल गरेर व्यवस्थित  गर्ने आश्वासन दिएको बताए । उनले भने–‘त्यतिन्जेलसम्म मेयर साहेवले भनेको कुरामा हामी सहमत छौं, छलफलले स्थायी पार्किङको व्यवस्थापन होस् भन्ने हाम्रो भनाई हो ।’