‘पाच दलीय गठबन्धनको घेराबन्दीमा पनि पार्टीले सफलता पायो’

धरान । दोस्रो स्थानीय तहको निर्वाचन भर्खरै सम्पन्न भएको छ । निर्वाचन सम्पन्न भई जनप्रतिनिधिहरु समेत चुनिइसकेको अवस्था छ ।

सत्ता गढबन्धन दलका विरुद्धमा एक्लै निर्वाचनमा उत्रिएको नेकपा एमालेले मोरङमा सफलता पाएको भन्दै नेकपा एमाले मोरङले मतदाताहरुलाई धन्यवाद दिदै विजेता जनप्रतिनिधिलाई कार्यकाल सफलताको शुभकामना दिएको छ ।

अध्यक्ष ऋषिकेश पोखरेलले एक विज्ञप्ती जारी गर्दै पाँच दलीय गठबन्धनको घेराबन्दी, राज्य शक्तिको दुरुपयोग, पार्टीको विरुद्धमा सिर्जना गरिएको अनेकौ चुनौति पार गर्दै मोरङमा अपेक्षाकृत सफलता प्राप्त गरेको उल्लेख गरेका छन् ।

उनले निर्वाचित जनप्रतिनिधिहरुले पार्टीका प्रतिबद्धता र आचारसंहिताका आधारमा जनअपेक्षालाई पूरा गर्दै पारदर्शी, भ्रष्टाचारशून्य र सहनशीलताको नीति अवलम्बन गर्दै काम गर्ने विश्वास पार्टीले लिएको जनाएका छन् । उनले विज्ञप्तीमार्फत एमालेबाट उठेका उमेद्वारलाई मत दिने मतादाता तथा पार्टीलाई प्रत्यक्ष वा अप्रत्यक्ष रुपमा सहयोग गर्ने सबैलाई विज्ञप्तीमार्फत धन्यवाद समेत दिएका छन् ।

मोरङमा १७ स्थानीय तहमध्ये एमालेले मोरङमा उर्लाबारी नगरपालिका, पथरी शनिश्चरे नगरपालिका, सुन्दर हरैचा नगरपालिका, सुनबर्षी नगरपालिका, लेटाङ नगरपालिका, रंगेली नगरपालिका, कानेपोखरी नगरपालिका र केराबारी गाउपालिकामाका आठ पालिकामा प्रमुख र उपप्रमुख जित हातेको, एक पालिका बेलबारी नगरपालिकामा प्रमुख र विराटनगर महानगपालिका,कटहरी गाउपालिका र रतुवामाई नगरपालिका गरी तीन स्थानीय तहमा मा उपप्रमुखमा जित हात पार्न सफल भएको उल्लेख गरिएको छ । यस्तै जिल्लाका १५९ वडामध्ये ७८ वडाध्यक्ष, ३६१ सदस्य जितेको विज्ञप्तीमार्फत जनाइएको छ ।

पार्टीले मोरङमा ८२९ जनप्रतिनिधिका लागि भएको निर्वाचनमा मेयर, उपमेर, वडाध्यक्ष तथा सदस्य गरी ४३९ जना निर्वाचित भएका छन् ।