_1693980289.gif "#")
धरान । ताप्लेजुङको सुकेटार विमानस्थलमा एक सातादेखि जहाज उडान अनियमित भएको छ । एक हप्तामा तीन उडान हुँदै आए पनि बाक्लो तुँवालोका कारण शुक्रवार, शनिवार र सोमवार पनि उडान अवरुद्ध भएको हो ।
प्रतिकूल मौसमकै कारण निरन्तर एक सातादेखि नेपाल वायु सेवा निगमको उडान अवरुद्ध भएको हो । गत शुक्रवार र शनिवार मौसममा सुधार नआएकाले उडान रद्द भएको थियो । सोमवार पनि मौसममा सुधार नआएपछि उडान रद्द भएको नेपाल वायु सेवा निगमका ताप्लेजुङ स्टेसन इन्चार्ज लोकेन्द्र लिम्बूले बताए ।
लगातार उडान अवरुद्ध भएपछि काठमाडौंका लागि टिकट लिएका यात्रु रोकिएका थिए । त्यस्तै काठमाडौंदेखि ताप्लेजुङ आउन लागेका यात्रु पनि उतै रोकिएका इन्चार्ज लिम्बूले जानकारी दिए । हालको समय पर्यटकीय मौसम भएकाले यात्रुको अत्यधिक चाप रहेको निगमले बताएको छ । यता यो मौसममा नियमित उडान नहुँदा यात्रु थप मारमा परेका छन् ।
नेपाल वायुसेवा निगमले सुकेटार विमानस्थलमा प्रत्येक साताको सोमवार, बुधवार र शुक्रवार उडान सञ्चालन गर्दै आएको छ । सोमवारसम्म बाक्लो तुँवालो र हुस्सु कायमै रहेकाले यो मौसममा सुधार नआएसम्म उडान प्रभावित हुन सक्ने नेपाल नागरिक उड्डयन प्राधिकरण, सुकेटार विमानस्थलले बताएको छ ।
