तालतलैयामा फोहोर व्यवस्थापन चुनौति

धरान । पछिल्लो समय सिमसार क्षेत्रहरु पर्यटकको आकर्षक गन्तव्य बन्दै गएको छ । सीमसार क्षेत्रमा पुगेर प्रकृतिको मनोरम दृश्य अवलोकनसँगै त्यहाँ रहेका पार्क, चिडिया घर लगायतले आन्तरिक तथा बाह्य पर्यटकहरुलाई लोभ्याउने गरेको छ ।

सिमसार क्षेत्रहरु जति पर्यटकीय स्थल बन्दै गएको छ, त्यतिनै दूषित पनि बन्दै गएको छ । सिमसार क्षेत्रको संरक्षण तथा फोहोर व्यवस्थापनमा चासो नदिदाँ प्रदुषित बन्दै गएको छ । सिमसार क्षेत्रमा आउने पानीको मुहान पनि सुक्दै गएका छन् ।

एकातिर वनभोज खान आउनेहरुले जथाभावि फोहोरले प्रदुषित बन्दै गएको छ भने तालतलैयामा रहेका जलकुम्भीका कारण आकर्षक तालतलैयाको सौन्दर्य नै हराउन थालेको छ । फोहोरले दुषित बनाउँदै गए पछि इटहरी स्थित तालतलैया क्षेत्रमा शनिबार सरसफाई गरिएको छ ।

तालमा भरिएका जलकुम्भीहरू नेपाली सेना, सशस्त्र प्रहरी वल लगायत स्थानीयहरूको सहयोगमा सरसफाइ गरिएको हो ।

जलकुम्भीले वातावरणमा नकरात्मक असर पर्ने र तालको सुन्दरता नै ढाकिने भएपछि सरसफाइ गरिएको तालतलैया संरक्षण समितीका अध्यक्ष लक्ष्मी प्रसाल खनालले बताए । उनले भने, ‘तालतलैयाको सुन्दरता देखेरै सयौ सर्वसाधारण तालतलैया घुम्न आउँछन् तर जलकुम्भीका कारण ताल कुरुप बन्दै गयो, यसको सुन्दरतामा निखार ल्याउन पनि हामीले सरसफाई गरेका हौं ।’

पछिल्लो समय तालतलैयामा रहेको पोखरी, चिल्ड्रेन पार्क, चिडिया घर र बिभिन्न आकृति खोपिएका ढुंगाका मुर्तिहरूले तालतलैयामा सर्वसाधारणको आकर्षण बढे पनि जलकुम्भीका कारण सुन्दरतामाथि नै आँच आउनसक्ने भएपछि सरसफाइ गरिएको उनले बताए ।