बर्जुका महिलालाई थाकलबाट सामग्री बनाउने तालिम

सुनसरी । सुनसरीको बर्जु गाउँपालिकामा महिलाहरुको लागि १४ दिने थाकलद्वारा हेण्डिक्राफ्ट, ब्याग तथा बिभिन्न सामाग्री बनाउने तालिम शुरु भएको छ ।

नेपाल ग्रिन लिक फाउन्डेसन प्रा.लि इटहरीको आयोजनामा भएको तालिमलाई उद्योग श्रम तथा रोजगार मन्त्रालय प्रदेश न.१ को कार्यालयले सहयोग गरेको हो ।

बुधबार देखि सुरु भएको तालिमको प्रशिक्षकको रुपमा रामरति चौधरी, ओम कुमारी चौधरी र सुनिता तिवारी हुमागाई रहेका छन् । २५ जनालाई प्रशिक्षण दिने योजना रहेको तालिमको प्रशिक्षक सुनिता तिवारी हुमागाईले जानकारी दिइन् ।

महिलाहरुलाई स्वरोजगार बनाइ आय आर्जनमा सहज बनाउने उदेश्यले तालिमको आयोजना गरिएको नेपाल ग्रिन लिक फाउन्डेसन प्रा.लि इटहरीकी अध्यक्ष निर्मला चौधरीले बताइन ।

तालिमको उदघाटनका प्रमुख अतिथि बर्जु गाउँपालिकाका अध्यक्ष रघुन्नदन चौधरीले शुभकामना दिंदै बेरोजगार महिलाहरुलाई रोजगार दिनका लागि प्रदेश मन्त्रालयको सहयोगमा संचालन भएको कार्यक्रममा तालिम भर उत्कुष्ट हुनेलाई मन्त्रालयबाट पुरस्कृत गराउन पहल गर्ने बताए । सीप सिकेर पसल खोल्नेहरुलाई गाउँपालिकाको तर्फबाट ५ हजार पुरस्कार दिने घोषणा गरेको छ ।