ज्येष्ठ नागरिकलाई खीर खुवाएर स्थापना दिवस मनाइयो

धरान/ प्रेस सेन्टर नेपालको सुनसरी समन्वय समितिले संगठनको १८ औँ स्थापना दिवस शनिबार ज्येष्ठ नागरिकहरूलाई खीर खुवाएर मनाएको छ ।

इटहरी १६ स्थित पकलीको रामजानकी शान्ति वृद्धाश्रममा खीर पकाएर त्यहाँका ज्येष्ठ नागरिकहरूलाई खुवाइएको सेन्टरका सुनसरी अध्यक्ष तीर्थ कार्कीले जानकारी दिए । दिवसको अवसरमा ज्येष्ठ नागरिकहरूलाई फलपूmल पनि वितरण गरिएको थियो । वृद्धाश्रममा १३ जना आमाहरू छन् । सो अवसरमा त्यहाँ आपसमा शुभकामना पनि आदान–प्रदान गरिएको थियो ।

अवसरमा वृद्धाश्रममै आयोजित शुभकामना आदान–प्रदान कार्यक्रममा प्रमुख अतिथि माओवादी केन्द्रका केन्द्रीय सदस्य निर्मल बराल, पार्टीका प्रदेश न. १ उपाध्यक्ष शिवकुमार डाँगी, माओवादी केन्द्र इटहरी उपमहानगर समितिका उपाध्यक्ष एवम् किरात बान्तवा खिमका केन्द्रीय अध्यक्ष ज्ञानु किराँती, पत्रकार महासङ्घका सुनसरी अध्यक्ष जनकऋषि राई, सेन्टरकै केन्द्रीय सदस्यहरू राजन केडी, भरतराज शर्मा (गोपाल), प्रदेश सचिव विशाल राई, प्रदेश सदस्य सञ्जय याक्खालगायत उपस्थित थिए । कार्यक्रममा नेताहरू बराल, डाँगी, सेन्टरका केन्द्रीय सदस्य अर्जुन शर्मा, वृद्धाश्रमका सञ्चालक विष्णु डाँगीले शुभकामना मन्तव्य राखेका थिए ।

कुनै रचनात्मक काम गरेर स्थापना दिवस मनाउने सोचले वृद्धाश्रममा आमाहरूलाई खीर र फलपूmल खुवाइएको सेन्टरका सुनसरी अध्यक्ष कार्कीले बताए ।
सेन्टरका जिल्ला सचिव अच्युत भट्टराईले सञ्चालन गरेको कार्यक्रममा सहसचिव मनोज निरौलाले स्वागत मन्तव्य व्यक्त गरेका थिए ।