धरान । तिन साता देखि हराइरहेकी धनकुटा नगरपालिका–४ छारागाँउकी ५२ वर्षीया सीता श्रेष्ठको हत्या गरी पुरेको अवस्थामा घरभित्रै शव फेला परेको छ ।
घरको भुइँतलामा पुरेको अवस्थामा सोमबार शव फेला परेको हो । शरीरमा विभिन्न खालका चोटहरु रहेको र शव गलेको अवस्थामा फेला परेको जिल्ला प्रहरी कार्यालयका डिएसपी सुरज कार्कीले जानकारी दिए । सीता हराएको भनेर २१ पुसमा जिल्ला प्रहरी कार्यालयमा उजुरी परेको कार्कीले जानकारी दिए । सीता श्रेष्ठका ३० वर्षीय भदा अरूण श्रेष्ठले फूपु हराएको भन्दै पुस २१ गते जिल्ला प्रहरी कार्यालयमा उजुरी दिएका थिए ।
सीताको हत्या घरायसी विवादको क्रममा उनकै श्रीमान सीताराम भनिने सीताकुमार श्रेष्ठले गरेको खुल्न आएको डिएसपी कार्कीले जानकारी दिए । श्रीमती हत्या गरी घरभित्र शव पुरेर फरार रहेका सीतारामलाई आइतबार ललितपुरबाट पक्राउ गरी धनकुटा ल्याएको प्रहरीले जनाएको छ ।
माघ ९ गते गिरफ्तारीमा परेका श्रेष्ठले पत्नीको हत्या गरी घरको भूँइतलामा खाल्डो खनि पुरेको बताएपछि माघ १० गते घटनास्थलबाट शव निकालिएको जिल्ला प्रहरी कार्यालयका डिएसपी कार्कीले बताए । शवको मुचुल्का उठाउँदा शरिरका विभिन्न भागमा चोट देखिएको डिएसपी कार्कीले बताएका छन् । आरोपितविरूद्ध प्रहरीले जिल्ला अदालतमा माघ १० गते कर्तव्य ज्यान शीर्षकमा मुद्दा दर्ता गरेको छ । शवको पोष्टमार्टम वीपी कोइराला स्वास्थ्य विज्ञान प्रतिष्ठान धरानमा सोमबार गरिएको छ ।