मन्त्री यादवलाई बरखास्त गर्न माग

धरान/ भौतिक योजना तथा निर्माण मन्त्री रेणु यादवले खुल्ला समारोहमा गौर हत्याकाण्ड ब्युतिन सक्ने अभिब्यक्ती दिएको विरोधमा राष्ट्रिय युवा संघ नेपाल सुनसरी जिल्ला कमिटिले विरोध गरेको छ ।
संघले इटहरीमा विरोध कार्यक्रम गर्दै मन्त्री यादवलाई वरखास्त गर्नुपर्ने माग गरेको छ । कार्यक्रममा राष्ट्रिय युवा संघ नेपाल इटहरी अध्यक्ष कमल दाहालले सरकार मनपरी ढंगबाट अघि बढेको बताउदै मन्त्री यादवलाई तत्काल पदमुक्त गर्न माग गरे । युवा संघका सुनसरी संयोजक सुजन लामाले मन्त्री यादवलाई अबिलम्ब बरखास्त गरिनु पर्ने बताए ।

उनले मन्त्री यादवलाई तत्काल बरखास्त नगरे युवा संघले थप आन्दोलनको कार्यक्रम अघि बढाउने बताए । उनले पेट्रोलियम पदार्थको मूल्य वृद्धि पटक पटक गरेको भन्दै जनतालाई त्यसले प्रत्यक्ष रुपमा मार परेकोले मूल्यवृद्धि तत्काल फिर्ता गर्न समेत माग गरे ।

अनेरास्ववियु क्षेत्र नं ३ अध्यक्ष युस्टल दाहाल (गोरे) ले पेट्रोलियम पदार्थ मुल्यवृद्धिले जनताले सास्ती पाएको र सरकारमा रहेका मन्त्रीले अराजकता उत्तेजना फैल्याउने शब्द प्रयोग गरी सरकारको देह प्रस्ट पारेकोले युवा संघ नेपालको कार्यक्रममा सरिक भै बिरोध गर्न बाध्य भएको बताए ।

कार्यक्रममा राष्ट्रिय युवा संघ नेपाल केन्द्रिय सदस्य तथा नेकपा एमाले जिल्ला सदस्य अरुण गुरुङ, युवा संघ केन्द्रिय सदस्य जितेन्द्र थापा, नेकपा एमाले जिल्ला सदस्य रुपेश बजगाई लगायतको उपस्थिती रहेको थियो ।