फाइल तस्वीर
खोटाङ/ वर्तमान गठबन्धन सरकार लामो समयसम्म टिक्ने अवस्थामा नभएकाले वर्तमान गठबन्धन भत्काउने वा चाँडो चुनावमा जाने अवस्थाबाट सरकार गुज्रिरहेको प्रदेश १ का पुर्व मुख्यमन्त्री तथा नेकपा एमालेका स्थायी कमिटी सदस्य शेरधन राईले बताएका छन् ।
उनले प्रचण्ड, माधव नेपाल र उपेन्द्र यादवका कारण प्रधानमन्त्री शेरबहादुर देउवा अफ्ठेरोमा परिरहेको दाबी गरेका छन् । एमाले खोटाङले आयोजना गरेको बधाई तथा शुभकामना कार्यक्रममा राईले भने, ‘गठबन्धनको सरकार लामो समयसम्म टिक्ने अवस्था छैन, शेरबहादुर देउवालाई असाध्यै गाह्रो भइरहेको छ, एकातिर प्रचण्डजस्तो मान्छे छ, अर्कातिर माधव नेपाल, अर्कातिर उपेन्द्र यादव, यी मान्छेहरुले शेरबहादुर देउवालाई अप्ठ्यारो बनाइरहेको अवस्था छ ।’ त्यसैले गठबन्धन भत्काउने वा छिटो चुनावमा जाने अवस्थामा अहिलेको गठबन्धन रहेको राईले बताए ।
स्थानीय चुनाव हुने बेला आइसकेकाले अवको निर्वाचनमा एमाले एक्लैले जित्ने उनले दाबी गरे । उनले भने, एमालेले एक्लै जित्नुपर्छ र समृद्धिको यात्रालाई अझ फराकिलो बनाउँदै लैजानुपर्छ, समृद्ध नेपाल र सुखी नेपालीको राष्ट्रिय आकांक्षालाई मूर्त रुप दिनुपर्छ, समाजवादको आधार तयार गर्दै अगाडि बढ्नुपर्छ ।’
सर्वोच्च अदालतले सेटिङमा परमादेशबाट बनाइदिएको केन्द्र सरकार र अध्यादेशबाट बनेको प्रदेश सरकारले अनुचित ढंगले निजी स्वार्थ पूरा गर्ने हिसाबले बजेट खर्च गरिरहेको उनले आरोप लगाए । उनले भने, ‘उसले न जनताका लागि राष्ट्रका लागि सोच्छ, न केही गर्छन्, हामीले थालेका राम्रा कामहरुलाई भत्काउने, त्यसलाई रोक्ने र अनुचित ढंगले श्रोतहरुको बजेटको दुरुपयोग गर्ने, आफ्नो निजी स्वार्थ पूरा गर्ने हिसावले खर्च गर्ने हिसावले काम गरिरहेका छन् ।’
