भेडेटारमा चहलपहल बढ्यो : आन्तरिक तथा वाह्य पर्यटकको घुँइचो

धरान/ पूर्वको पर्यटकीय स्थल धनकुटाको भेडेटारमा पछिल्लो समय आन्तरिक तथा वाहय पर्यटकको चहलपहल बढ्न थालेको छ ।
लकडाउनले सिथिल बनेको भेडेटारमा अहिले आन्तरिक तथा बाह्य पर्यटक आउन थालेका छन् । कोभिड १९ का कारण लामो समयदेखी आर्थिक मारमा परेका व्यवसाय अब चहल पहल बढेसंगै पहिले कै स्थितिमा फर्कने आसामा छन् होटल व्यावसायीहरु पनि ।

लकडाउनका कारण आन्तरिक तथा बाह्य पर्यटक नआउँदा भेडेटारको व्यवसाय अघिल्लो ६ महिना ठप्प जस्तै बन्यो । पर्यटनले नै धानेको भेडेटारमा आन्तरिक पर्यटकको चहल पहल बढ्न थालेको छ । चहल पहल बढेसंगै विगतमा भोगेको आर्थिक भार कम हुनेमा होटल व्यवसायीहरु आसावादी बनेका छन् ।

भेडेटारका होटल व्यवसायी राम ढकालले कोरोना पछिको सहज अवश्था भएपनि चिसो मौसममा पर्यटकहरु कमै आउने गरेको बताउँछन् । यद्यपि विगतको तुलनामा अहिले पर्यटक बढेको उनी बताउँछन् । उनी भन्छन्, ‘कोरोनाको असहज परिस्थितिले भेडेटारको व्यवसायी मारमा परे, सहज बनेपछि केही पर्यटक आउन थाले पनि चिसो मौसममा गर्मी मौसमजस्तो आउदैनन्, त्यही पनि विगतको भन्दा अहिले केही सहज भने भएको छ ।’

चहलपहल बढेसंगै भेडेटारमा प्रदेश नं. १ बाट सर्वसाधारण भेडेटारको मनोरम दृश्य अवलोकन गर्न पुग्न थालेका छन् । भेडेटारमा पहिलाको जस्तो चहल पहल नबढे पनि लामो समयसम्म घुमफिर गर्न पाउँदा अत्यन्तै रमाइलो लागेको पर्यटकहरु बताउँछन् । विराटनगरबाट भेडेटार घुम्न आएकी सम्झना बुढाथोकीले भेडेटार नेपालकै आकर्षक स्थल भएको बताइन् । उनले भनिन्, ‘लामो समयपछि भेडेटार आउँदा मलाई अत्यन्तै खुशी लागेको छ ।’ परिवारसंग घुम्न आएकी उनले परिवारसंग भेडेटारका मनोरम दृश्य घुम्दै क्यामेरामा फोटो कैद गर्न पाउँदा अझ रमाइलो लागेको बताईन् ।

भेडेटारमा चैत्र महिनादेखी चहल पहल बढ्ने गर्छ । यो समय व्यवसायीहरुको लागि आर्थिक उपार्जन गर्ने समय हो । तर, लामो समयसम्म लकडाउन भएपछि व्यवसायीहरुले ठुलो आर्थिक भार ब्यहोर्नु प¥यो । व्यवसायीहरुले यो अवधिमा अर्बों घाटा ब्योहोर्नु परेको होटल एशोसिएसन अफ भेडेटारका अध्यक्ष जितेन्द्र रुम्दालीले बताए । ठप्प बनेको व्यवसायका कारण धरासायी बनेका होटल व्यवसायीहरु पर्यटकको आगमनसँगै अब भने तङरिने आशा पलाएर आएको उनले बताउँछन् । उनले भने, ‘विगतको जस्तो असहज परिस्थिति फेरि नआए व्यवसायीहरु उक्सिन्छन्, फेरि त्यही अवस्था आए व्यवसायी विस्थापित हुन अवस्था आउछ ।’

भेडेटारमा छिमेकी मुलुक भारतका विभिन्न स्थानबाट पर्यटक आउने गर्दथे । कोभिड १९ का कारण अझै पनि भारतीय पर्यटक भने आउने वाताबरण बनिसकेको छैन । आन्तरिक पर्यटकले नै धानेको भेडेटारमा चहल पहल बढेपछि व्यावसायीहरु उत्साहित बनेका छन् ।

एशोसिएसनका अनुसार भेडेटारमा साना तथा ठुला गरी करिब १ सय ५० वटा होटलहरु सञ्चालित छन् । रमणिय पर्यटकीय स्थल भेडेटार घुम्न आउने पर्यटकहरुले यहाँका होटलहरु प्राय खचाखच भरिने गर्दथे । भेडेटारमा रहेको चाल्स पइन्ट, शंख पार्क, भूत घर, नाम्जे होमस्टे, नमस्नेत झरना लगायतका दर्जनौ पर्यटकीय स्थलले पर्यटकहरु लोभ्याउने गर्छ ।