धरान/ नेपाली काङ्ग्रेसको भ्रातृ संगठन नेपाल विद्यार्थी सङ्घका निवर्तमान केन्द्रीय सदस्य डा अबुल हुसेन अन्सारीले प्रदेश नम्बर १ बाट काङ्ग्रेस केन्द्रीय सदस्यका लागि उम्मेदवारी दिएका छन् ।
उनले काङ्ग्रेसको १४ औँ महाधिवेशनमा मुस्लिम कोटाबाट उम्मेदवारी घोषणा गरेका हुन् ।
सुनसरी क्षेत्र नं. ४ (ख) मा भोक्राहा नरसिंह गाउँपालिका–४ को वडा अधिवेशनमा क्षेत्रीय प्रतिनिधि हुँदै क्षेत्र नं.४ को क्षेत्रीय अधिवेशनबाट उनी भारी मतले केन्द्रीय महाधिवेशन प्रतिनिधिमा निर्वाचित भएका थिए ।
उनको पारिवारिक पृष्ठभूमि पनि काङ्ग्रेससँग जोडिएको छ । डा अन्सारीका दाजु हारुन अन्सारी सुनसरी क्षेत्र नं.४ (ख) का पूर्वसभापति तथा भोक्राहा नरसिंह गाउँपालिका–४ मा काङ्ग्रेसबाट निर्वाचित वर्तमान वडाध्यक्ष हुन् ।
३० वर्षअगि सुनसरी सदरमुकाम इनरुवालाई केन्द्र बनाएर पत्रकारिता पेशामा सक्रिय अन्सारीले बङ्गलादेशबाट चिकित्साशास्त्रको अध्ययन पूरा गरेका हुन् । मुस्लिम समुदायका अग्रज नेताहरू जिल्ला अधिवेशनबाटै महाधिवेशन प्रतिनिधिमा पराजित भएपछि र केन्द्रीय महाधिवेशन प्रतिनिधि गफार अन्सारी केन्द्रमा जान अनिच्छुक देखिएकाले प्रदेश १ बाट केन्द्रीय सदस्यका लागि आपूm उपयुक्त उम्मेदवार उनको दाबी छ । काङ्ग्रेस सभापति शेरबहादुर देउवा निकट अन्सारीले केन्द्रीय नेताहरूको सल्लाह र परामर्शमा उम्मेदवारी घोषणा गरेको बताए ।
