मेघा कलेजको कार्यक्रम इलामको फिक्कलमा

धरान/ धरानको मेघा कलेजले आफ्ना विद्यार्थीहरूका लागि स्वागत र विदाइ कार्यक्रम इलामको पर्यटकीय स्थान फिक्कलमा सम्पन्न गरेको छ । मङ्गलबार गएको टोली कार्यक्रम सकेर बुधबार मात्र धरान फर्किएको छ ।

कार्यक्रममा बीबीएस पहिलो वर्षका विद्यार्थीहरूलाई स्वागत गरिएको थियो भने बीबीएस चौथो वर्षका बिद्यार्थीहरूलाई विदाइ गरिएको थियो । कार्यक्रममा बीबीएस दोस्रो र तेस्रो वर्षका विद्यार्थीहरू पनि सहभागी थिए । करिब एक घण्टा लगाएर विद्यार्थीहरूले नै तयार पारेको अस्थायी मञ्चमा कार्यक्रम गरिएको थियो ।

कलेजकै चारवटा बस कलेजका प्रशासक, विद्यार्थी र अध्यापकहरू बोकेर मङ्गलबार बिहान त्यसतर्फ गएको थियो । बसमै राखेर लगिएका सामग्रीबाट विद्यार्थीहरूले फिक्कलको प्राकृतिक दृश्यलाई पृष्ठभूमि बनाएर मञ्च बनाएका थिए । कलेजका एडमिनिस्ट्रेटिभ डाइरेक्टर कैलाश लिम्बू, म्यानेजमेन्ट कोअर्डिनेटर चन्द्र वनेम, सञ्चालकद्वय प्रभास राजवंशी र सागर खड्का तथा अध्यापकद्वय ज्योति थापा मगर र करण श्रेष्ठले विद्यार्थीहरूलाई खदा र अबिर लगाइदिएका थिए ।

बिद्यार्थीहरूलाई फरक स्थान र फरक परिवेशको अनुभूति दिँदै स्वागत र विदाइ गर्न प्राकृतिक सौन्दर्ययुक्त पर्यटकीय क्षेत्रमा कार्यक्रम गरिएको एडमिनिस्ट्रेटिभ डाइरेक्टर लिम्बूले बताए । सधैँ एउटै ठाउँमा एकै किसिमले गर्नुभन्दा रमणीय ठाउँमा कार्यक्रम गर्दा एकदमै फरक र रमाइलो अनुभूति भएको बीबीएस पहिलो वर्षकी छात्रा सपना राईले बताइन् ।

दुईदिने कार्यक्रममा स्वागत र विदाइका साथै नेपालकै प्रसिद्ध पर्यटकीय स्थल श्रीअन्तुको भ्रमणसमेत गराइएको कोअर्डिनेटर वनेमले जनाए । फिक्कलमा कार्यक्रम सकेर मङ्गलबार साँझ श्रीअन्तुको घरवासमा बसी भोलिपल्ट अन्तुडाँडाबाट सूर्योदयको रमणीय दृश्यावलोकन गरिएको सञ्चालक सागर खड्काले बताए । अर्का सञ्चालक राजवंशीले विद्यार्थीहरूलाई फरक अनुभूति गराउन प्राकृतिक क्षेत्रमा कार्यक्रम राखिएको सुनाए । अन्तुडाँडाबाट देखिएको सूर्य उदाउँदै गरेको दृश्यले मन साँच्चै रोमाञ्चित भएको बीबीएस दोस्रो वर्षकी छात्रा श्वेता भुजेलको अनुभव छ ।