देउवाको भर्चुअल भाषण नसुन्न कार्यक्रम नै स्थगन

विराटनगर/ नेपाली काङ्ग्रेसको १४ औं महाधिवेशनअन्तर्गत बिहीबार प्रदेश नम्बर १ को प्रदेश अधिवेशनको उद्घाटन विराटनगरमा तय भएको थियो । दिउँसो २ बजेको लागि तय भएको कार्यक्रममा सहभागी हुन प्रदेशभरबाट प्रतिनिधिहरु विराटनगर अस्पताल छेउको मैदानमा भेला भएका थिए । केन्द्रीय नेताहरु कतिबेला आउलान र कार्यक्रम शुरु होला भन्ने पर्खाइमा थिए ।
समय घर्किदै साँझ परुन्जेलसम्म कार्यक्रम शुरु भएन ।

कांग्रेसका मोरङ सभापति डिगबहादुर लिम्बूले कार्यक्रम केहीबेरमै शुरु हुने माइकबाट सूचना प्रसार गरिरहेका थिए । तर, एकाएक कार्यक्रम शुक्रबार बिहान ८ बजे हुने घोषणा भयो । कांग्रेसको नयाँ निर्वाचन तालिकाअनुसार बिहीबार अधिवेशन उद्घाटन गर्ने, शुक्रबार उमेदावरी दर्ता, उमेदवारी फिर्तासहितका प्रक्रिया सक्ने र शनिबार निर्वाचन गर्ने भन्ने थियो । अन्ततः प्रतिनिधि र सहभागी निरास भएर फर्किए ।

अधिवेशन उद्घाटन र आयोजनाको जिम्मेवारी मोरङ जिल्ला समितिको थियो । आयोजक समितिका संयोजक सभापति लिम्बूले पार्टीका केन्द्रीय सभापति शेरबहादुर देउवाले भर्चुअल भाषण सुनाउने भन्ने जानकारी प्राप्त भएको तर त्यसको व्यवस्थापन गर्न नसकिएपछि भोलिपल्टको लागि अधिवेशन स्थगित गरिएको जानकारी दिएका छन् । तर कांग्रेसजनले इतर समूहका भएकोले लिम्बूले पार्टी सभापतिको भाषण सुनाउन नचाहेको बताएका छन् । लिम्बू दुई दिनअघि मात्र मोरङ सभापतिमा पौडेल–कोइराला समूहबाट विजयी बनेका हुन ।

अन्ततः कार्यक्रम नहुने भएपति मंचमै आएर नेपाली काङ्ग्रेस प्रदेश नम्बर १ अधिवेशन आयोजक समितिका संयोजक एवम् पार्टी केन्द्रीय सदस्य कृष्ण सिटौलाले साँझ पौने पाँच बजे अधिवेशन उद्घाटन शुक्रबार बिहानसम्मको लागि स्थगन गरिएको घोषणा गरे । उनले भने, “केही व्यवस्थापकीय समस्याले गर्दा अधिवेशनको उद्घाटन समारोह स्थगित गर्नुपरेको हो ।”

चुनावी प्रक्रियामा सहभागी हुन प्रदेशका १४ जिल्लाबाट एक हजार ७ सय प्रदेश अधिवेशन प्रतिनिधि विराटनगरमा भेला भएका छन् । तीमध्ये अधिकांश अधिवेशन उद्घाटन स्थल पुगेका थिए । सिटौलाले शुक्रबार बिहान छोटो रूपमा अधिवेशनको उद्घाटन गरिने जानकारी दिए ।
मोरङ काङ्ग्रेसका सभापति लिम्बूले अधिवेशनको आयोजक समितिको बैठकमा अन्तिम बेलामा आएर सभापति देउवाले भर्चुअल भाषण गर्ने भन्ने विषयले प्रवेश पाएको र त्यसलाई व्यवस्थापन गर्न असम्भव भएको आफूले बताएको जानकारी दिदैं भने,“शुक्रबार पनि सभापति देउवाको भर्चुअल भाषण हुने वा नहुने भन्ने तय भएको छैन ।”