अन्तरधार्मिक शान्ती सम्वाद सम्पन्न

इटहरी/ स्थानीय स्तरमै धर्मका अनुयायीहरु बिच धार्मिक सहिष्णुता र धार्मिक सद्भाब प्रवद्र्धन गर्न अभियान संचालन गरिरहेको मोरङको लेटाङमा अन्तरधार्मिक शान्ती सम्वाद सम्पन्न भएको छ ।

प्रदेश न. १ लाई कार्य क्षेत्र बनाई २२ बर्षदेखि निरन्तर सामाजिक सेवामा रहेको सामुदायिक विकास मञ्च नेपालले दशै तथा दिपावलीको शुभकामना आदानप्रदान कार्यक्रम गर्दै हिन्दु, इसाई, किँरात, इस्लाम, स्वर्गिक मार्ग र बौद्ध धर्मका ६ धर्मगुरु सहित अनुयायीहरुको उपस्थितमा शान्ती सम्वाद सम्पन्न गरेको हो । कार्यक्रममा भिन्न भिन्न धर्महरुलाई एकताको सुत्रमा बाध्न हरेक मौलिक पर्वहरुको महत्वमा वृद्धि भएको सहभागीहरुले बताए ।

समुदायमा व्याप्त लैगिंक हिंसा, लैगिक असमानता र विभेद विरुद्ध कोभिड १९ को कारण भएको लैंगिक हिंसा न्युनिकरण सम्बन्धि एक दिवसिय तालिम पनि सम्पन्न भएको छ । तालिममा लेटाङ नगरपालिकाको कर्मचारी लक्ष्मी लामाले सहजीकरण गरेकी थिईन् । शुभकामना आदान प्रदान कार्यक्रम किशोर कुमार भट्टराइको अध्यक्षतामा लेटाङ नगरपालिकाकी उप प्रमुख कृष्णकुमारी निरौलाको प्रमुख आतिथ्य रहेको थियो ।

कोभिड १९ को कारण मानसिक रुपमा पर्न सक्ने असर सम्बन्धी धार्मिक अगुवाहरुको लागि प्रदेश स्तरीय एक दिवसीय तालिम पनि दिइएको थियो । तालिममा लेटाङ नगरपालिकाको स्वास्थ्य शाखा प्रमुख तथा जन स्वास्थ अधिकृत दिनेश कुमार चौधरीले सहजीकरण गरेका थिए । धार्मिक अगुवाहरुको सीप तथा क्षमता विकास भएको साथै मानसिक स्वास्थ्य, यसको असर तथा रोकथाम र न्युनिकरणका उपायहरुका बारेमा सहभागीहरु लाई सहजिकरण गरिएको थियो ।