_1693980289.gif "#")
विराटनगर/ कोरोना संक्रमणका कारण यो वर्ष पनि विराटनगरमा श्रीकृष्ण रथयात्रा गरिएन । हरेक वर्ष जन्माष्टमीको भोलिपल्ट राधाकृष्ण मन्दिरबाट रथयात्रा निकाल्ने चलन थियो । कोरोना महामारीका कारण मंगलबार विराटनगरमा खटयात्रा निकालिएको छ ।
विगतमा ठूलो संख्यामा दर्शनार्थी भेला भई रथ तान्ने र पूजाआजा गरिन्थ्यो । रथलाई नगर परिक्रमा गराउन हजारौं भक्तजन सहभागी हुने गर्दथे । तर, विगत वर्ष झैं यो पटक पनि रथयात्रा सम्भव नभएपछि खटयात्रा निकालिएको राधाकृष्ण मन्दिर व्यवस्थापन समितिले जनाएको छ ।
अध्यक्ष बाबुराजा ओझाले धार्मिक परम्परालाई निरन्तरता दिनकै लागि खटयात्रा निकालिएको बताए । यो पटक तीनपैनी चोकस्थित राधाकृष्ण मन्दिरबाट राधाकृष्णको मूर्तिलाई खटमा राखेर यात्रा शुरु भएको थियो ।
गाडीमा खट राखेर नगरबासीलाई दर्शन गराउँदै खटयात्राले तीनपैनी चोक, ट्राफिक चोक, रोडशेष चोक, बरगाछी र राजवंशी चोक भएर पुष्पलाल चोकबाट फेरि मन्दिरतर्फ आएको थियो । सडक किनारमा उभिएर दर्शनार्थीले खटयात्रा अवलोकन गरेका थिए । विराटनगर महानगरपालिकाका मेयर भीम पराजुली खटयात्रामा सहभागी थिए । पराजुलीले भने, “कोरोना जोखिम कायमै रहेकोले भिडभाड नगरी खटयात्रा निकालेका हौं ।”
अध्यक्ष ओझाका अनुसार विराटनगरमा वि.सं १९८८ बाट खटयात्रा सुरु भएको थियो । २०२४ सालपछि भने रथयात्रा निकाल्ने गरियो । रथसँगै पुरानो खटलाई पनि बजार परिक्रमा गराइन्थ्इो । प्यागोडा शैलीको २२ फिट लम्बाइ, १४ फिट चौडाइ र १८ फिट उचाइको रथ भने मन्दिर परिसरमा नै राखिएको छ ।
