खोलाको धार परिवर्तन : फोक्लेन टापु जोड्ने झोलुङ्गे पुल जोखिममा

इटहरी । मोरङको लाटि खोलामा आएको बाढिले फोक्लेन टापु जोड्ने झोलुङ्गे पुल जोखिममा परेको छ ।
केहि दिन यता परेको अविरल वर्षाका कारण खोलाले धार परिवर्तन गर्दै डिल भत्काउन थालेपछि फोक्लेन टापु जोडने झोलुङ्गे पुल जोखिममा परेको हो । खोलाले मोरङको सुन्दरहरैंचा ५ स्थित पुलको डिल भत्काउन थालिसकेको छ भने जोखिम पनि त्यतिकै बढाएको छ । पुलको बिषयमा थप अध्ययन गर्न सुन्दरहरैंचा नगरपालिकाका प्रमुख प्रशासकीय अधिकृत डा. कृष्ण बहादुर घिमिरे सहितको टोलिले अनुगमन गरेको छ ।

स्थानीयबाट बहावले पुल तर्फ कटान गर्न थालेको स्थानीयले गुनासो गर्न थाले पछि रोकथामको काम सुरू गरिएको वडाध्यक्ष रामप्रसाद रिजालले जानकारी दिए । प्रमुख प्रशासकीय अधिकृत डा. घिमिरेले तत्कालका लागि खोलाको बहाव परिवर्तन गर्ने काम गरिएकोमा पुलमा थप क्षति हुन नदिन तारजाली लगाउन आवश्यक रहेको देखिएकाले त्यसतर्फ अघि बढ्ने बताए । मोरङ क्षेत्र नम्बर ६ का सांसद् तथा पूवमन्त्री लालबाबु पण्डितको पहलमा निर्माण सम्पन्न भइ गतवर्ष फागुनदेखि मात्र पुल सञ्चालमा आएको थियो ।

पुल निर्माण भएपछि सुन्दरहरैंचा ५ फोक्लेन टापुका करिव ६० घरपरिवारलाई वडा कार्यालय र नगरपालिका पुग्न सहज भएको छ । यता स्थानीयबासीले समेत तत्काल पुल संरक्षण नगरिए पुल नै बगाउने अवस्था आउने गुनासो गरेका छन् । खोलामा पानीको बहाव बढेसंगै पुल जोखिममा परेको र तत्काल संरक्षणको निमित्त सम्बन्धित सरोकारवालाहरूले कुनै चासो नराखे भोलीको दिन ठुलो क्षति हुन सक्ने वडा सदस्य पर्शुराम घिमिरेले बताए । पुलमा क्षति पुगेको अवस्थामा एकातर्फ स्थानीयलाई आवत जावतमा समस्या हुन्छ भने अर्कोतर्फ राज्यको करोडौंको सम्पती खेर जाने अवस्था सिर्जना हुने देखिन्छ ।