पहिरोको जोखिममा प्रसारण लाईन टावर र एड्भेञ्चर पार्क (भिडियो सहित)

धरान । केहि दिन अघिको वर्षाले विष्णुपादुका क्षेत्रका डाँडाहरु भासिन थाले पछि राष्ट्रिय गौरबका योजनाहरु सहित पर्यटकीय पुर्वाधार पनि जोखिममा परेको छ ।
विष्णुपादुका २० हुँदै विस्तार गरिएको २ सय २० केभि प्रसारण लाईन अन्तर्गतको चिण्डेडाँडा हुँदै सुलिकोट र तामाखाम जाने चोकमा रहेको टावर जोखिममा परेको हो । टावर राखिएको क्षेत्र भासिनुका साथै पहिरोको जोखिममा परेको छ भने पर्यटक प्रवद्र्धनका लागि निर्माण गरिएको सेक्ष एडभेञ्चर पार्क पनि जोखिममा परेको छ ।
पार्कका संचालन बासुदेव बरालका अनुसार टावर राखिएको स्थान भासिदै गएको छ भने कच्ची सडक पनि चिरा परेर पहिरो जान लागेको छ । त्यसकै तल्लो भागमा रहेको पार्क जोखिममा रहेको छ । वरालका अनुसार उक्त स्थानमा टावर निर्माण गर्दा एउटा डाँडा काटिएको थियो । डाँडा काटेर ठड्याइएको प्रसारण लाइनको टावरलाई जोगाउन पक्की वाल निर्माण गरिएको छ । उक्त वाललाई पनि जोगाउनको लागि ग्याबिङ वाल बनाइएको छ ।
ग्याबिङ वालको छेउमा रहेको माटोको थुप्रो भारलाई ग्याबिङ वालले थेग्न नसकेर भत्कन शुरु गरेको उनले बताए । उनले भने, ‘बाटो चिरा चिरा परेको छ भने ग्याबिङ वालले ठाउँ छोडेर खस्नै लागेको छ, यो पुरै खस्यो भने तल रहेको सेक्ष एड्भेञ्चर पार्कलाई क्षतविक्षत बनाउने जोखिम छ, । तुरुन्त रोकथाम गर्न सकिएन भने टावरको संरचना, कम्पाउण्ड वाल सबै भत्किन्छ र ठुलो क्षति हुने उनले बताए । बर्षाको समय भएकोले ठुलो पानी पर्दा ग्याबिङ वाल भत्किएर खस्ने खतरा रहेको भन्दै उनले सम्बन्धित निकायहरुले चाडो ध्यान दिन पनि आग्रह गरे ।
सेक्ष एड्भेञ्चरले जोखिम न्युनीकरणको लागि उपमहानगरपालिकामा निवेदन दिएपनि हालसम्म कुनै प्रयास नभएको उनी बताउँछन् । केही दिनअघि वडाअध्यक्ष, सदस्यहरु अवलोकन गर्न आउदा जालीको ढुंगाहरु निकालेर भार कम गर्ने भनेपनि थप पहल नभएको उनले गुनासो गरेका छन् ।