पागल घोडाविरुद्ध

अलिखित इतिहासको
एउटा खण्डबाट
अप्राकृतिक रूपमा
फुत्त निस्किएको पागल घोडा
कुदिरहेछ जथाभावी
सभ्यताका बारहरू भत्काउँदै
घामका किरणहरूलाई कुल्चँदै
पाखाभरि राताम्मे फुलेका
लालीगुराँसका नीला भावनाहरूमाथि
निर्मम टापहरू बजार्दै
बेलगाम कुदिरहेको पागल घोडा
समयको वेगलाई पल्टाउने
हास्यास्पद प्रयासमा
अघिल्ला खुट्टाहरू उफारेर
वीभत्स हिन्हिनाइरहेछ
यति बेला जोखिममा परेको छ गुराँसको अस्तित्व
शताब्दीयौँदेखि
आँधी र असिनालाई झेल्दै आएका गुराँसहरू
अस्तित्व रक्षाका निम्ति अन्तिमपटक
ज्यानको बाजी थापेर
उभिएका छन् पागल घोडाविरुद्ध
शिशिरका अन्तिम प्रहरहरू
गालामा चीसो थप्पड हिर्काएर चिप्लिरहेका छन्
पागल घोडाको वेगसँगै हुर्रिएर
पहेँला पातहरू उडिरहेका छन्
घोडालाई पछ्याउँदै
कहिल्यै नदेखिएका पहेँला पातहरू
दुलोबाट निस्किरहेका छन् फुत्त–फुत्त
समयभन्दा पहिले नै पुगेका छन्
मृत्युका पदचापहरू कोलाहल मच्चाउँदै
मानव बस्तीहरूमा
शान्त पर्वत प्रान्तका निरीह जीवनहरू
यस युगकै अभूतपूर्व हिमपातसँग युद्धरत् छन्
पागल घोडा कुदिरहेकै छ
हरिया झारहरूलाई निमोठ्दै
बेमौसमको राग अलाप्दै
पहेँला पातहरूको जुलुस निस्किएको छ सडकमा
पर्वत प्रान्तमा अभूतपूर्व हिमपात भइरहेको छ
प्रयास भइरहेको भ्रम पैmल्याउने
मानौँ– हरियालीको युग समाप्त भएको छ अब
तर वसन्त परबाट हात हल्लाइरहेको छ
किनभने शिशिरका शुष्क पाइलाहरू
समयको छातीमा तिखा नङ्ग्राहरू गाड्दै
आप्mनो यात्राको अन्तिम क्षणमा
कष्टपूर्वक घस्रिरहेका छन् ।