भैँसी फारममा आगोलागी

वराहक्षेत्र/  वराहक्षेत्र–५ को इन्द्रेणी टोलस्थित वराह कृषि फारममा आइतबार बिहान ४ बजेतिर आगलागी हुँदा २० लाख रुपैयाँ बराबरको क्षति भएको छ ।

आगोलागीबाट ४ वटा माउ भैंसी र बाख्राका ३ वटा पाठा जलेर मरेका छन् भने ४ वटा माउ भैंसी, २ पाडा र १ पाठा घाइते भएको महेन्द्रनगर इलाका प्रहरी कार्यालयले जनाएको छ ।

प्रहरीका अनुसार आगो नियन्त्रणका क्रममा फारमका सञ्चालक ६१ वर्षीय अमरबहादुर कार्की गम्भीर घाइते भएका छन् । उनको शरीरको पछाडिको भाग र टाउको जलेको छ । धरानको वीपी कोइराला स्वास्थ्य विज्ञान प्रतिष्ठानमा उनको उपचार भइरहेको छ ।

आगोलागीमा ३१ वर्षीय हरि खत्री पनि सामान्य घाइते भएका छन् । उनको दाहिने हातको हड्डीमा चोट लागेको बताइएको छ ।
आगोलागीमा नगद ४० हजारका साथै १० बोरा चोकर, टीभी, फ्रिज, पराल काट्ने मिसिनसहित मोटर, धान, लत्ताकपडालगायत जलेर नष्ट भएको प्रहरी जनाएको छ । प्रहरी, स्थानीय र वराहक्षेत्र नगरपालिकाको दमकलको सहयोगमा आगो नियन्त्रणमा लिइएको थियो ।

भैंसीको गोठमा टिनको छानो भए पनि भैंसीलाई गर्मी हुने भएकोले टिनमुनि खर लगाइएको थियो । वरिपरि पनि खर र टिनले बारिएको थियो तर आपत्कालीन अवस्थामा निकाल्न नसक्दा ठूलो क्षति भएको प्रहरीले जनाएको छ ।