कानेपोखरीमा विद्युतीय खरिद प्रणाली लागू

मोरङ/  कानेपोखरी गाउँपालिकामा शुक्रबार आठौं गाउँसभा शुरु भएको छ । गाउँसभामा छलफलका लागि ६ वटा विधेयक प्रस्तुत गरिएको गाउँपालिका अध्यक्ष ताराबहादुर काफ्लेले जनाए ।

नेपालमा सङ्घीयताको अभ्यास नयाँ भएको हुँदा स्थानीय सरकारलाई प्रभावकारी वनाउन कानुनको अभाव रहेकोले कानुन निर्माणमा विशेष ध्यान दिएको अध्यक्ष काफ्लेको भनाइ छ ।

गाउँसभामा उपाध्यक्ष राजमती इङ्नामले चालू आवमा भएका विकास निर्माण तथा अनुगमनसम्बन्धी क्रियाकलापको समीक्षा प्रस्तुत गरिन् । यसैगरी २ नं. वडाध्यक्ष सुशिल बुढाथोकीले चालू आवको हालसम्मको आम्दानी र खर्चको विवरणबारे सभालाई जानकारी दिए ।

गाउँपालिकामा सेवा प्रवाहको गुणस्तरमा वृद्धि गर्न सभामा पुरक वजेट पेश गरिएको छ । २ नम्बर वडाध्यक्ष बुढाथोकीले हालसम्म चालू खर्चतर्पm ४३ प्रतिशत र पूँजीगत खर्चतर्फ २९ प्रतिशत खर्च भएको जानकारी गराए । चालू आवमा गाउँपालिकाले शुरुदेखि नै टेन्डर आह्वान गरेको हुँदा पूँजीगत खर्चको प्रगति ९५ प्रतिशतभन्दा माथि हुने अनुमान गरिएको उनले जनाए । गाउँपालिका अध्यक्ष काफ्लेले गत वर्ष कोरोनाको कारण अपेक्षित कार्य हुन नसके पनि ७० प्रतिशतभन्दा वढी पूँजीगत खर्च भएकोमा यस वर्ष शतप्रतिशत हुने आशा व्यक्त गरे ।

जनप्रतिनिधि र कर्मचारीबीच राम्रो समन्वयका कारण विकास निर्माणको काम द्रुत गतिमा भइरहेको उनको भनाइ छ ।

यसैगरी चालू आवमा छनोट गरिएका ५५ वटा योजना तथा कार्यक्रमलाई संशोधनका लागि सभामा पेश गरिएको छ । गाउँपालिकाले रोजगारी सिर्जना हुने, लागत सहभागिता हुने र विशेष ज्ञान, सीप नचाहिने प्रकृतिका कामहरू उपभोक्ता समितिमार्पmत् र अन्य कामहरू टेन्डरमार्फत् गरेको बताएको छ । खरिद कार्यमा प्रतिस्पर्धात्मक वातावरणलाई संरक्षण तथा सम्वर्धन गर्न गाउँपालिकाले गत आवदेखि नै पूर्णरूपमा विद्युतीय खरिद प्रणाली लागू गरेको गाउँपालिकाले जनाएको छ ।

चालू आवमा यसै प्रणालीबाट करीब ९ करोड रूपैयाँका १८ वटा खरिद कार्य शुरु गरिसकेको लेखा अधिकृत अजित भट्टराईले जनाए । यसले गर्दा ३ करोडभन्दा बढी रकम बचत भएको र यसलाई अत्यावश्यक क्षेत्रमा पुनः प्रयोग गरिने प्रमुख प्रशासकीय अधिकृत गायत्र श्रेष्ठले बताए । उनले गाउँसभाको अर्को बैठक सोमबार बस्ने बताए ।