हातमा दल्ने सेनिटाइजर खाँदा दुईको मृत्यु

विराटनगर,हातमा दल्ने सेनिटाइजर खाँदा मोरङमा दुईजनाको ज्यान गएको छ ।ज्यान गुमाउनेमा झापाको शिवसताक्षी नगरपालिका–४ घर भई विराटनगर महानगरपालिका–१७ स्थित रघुपति जुटमिलको क्वार्टरमा बस्ने ६५ वर्षीया अम्बिका गिरी र मोरङको जहदा गाउँपालिका–४ का ६० वर्षीय दिनेश मण्डल छन् ।

किटाणु नष्ट गर्न प्रयोग गरिने सेनिटाइजर खाएर उनीहरू सिकिस्त भएका थिए । उपचारका क्रममा अस्पतालमा उनीहरूको मृत्यु भएको जिल्ला प्रहरी कार्यालयका एसपी सन्तोष खड्काले जानकारी दिए ।

गिरीले मदिरा भनेर र मण्डलले पारिवारिक विवाद बढ्दा सेनिटाइजर खाएको खुल्न आएको प्रहरीको भनाइ छ । मदिराको नशामा रहेकी गिरीले शनिबार राति ११ बजे आधा लिटर सेनिटाइजर खाएकी थिइन् ।

मण्डलले पनि शनिबार राति १० बजेतिर सेनिटाइजर खाएको खुलेको प्रहरीले जनाएको छ । कोशी अस्पतालमा उपचारका क्रममा उनीहरूको मृत्यु भएको बताइएको छ । सेनिटाइजरमा पनि विषादी हुने भएकाले सेवन गर्दा ज्यान जाने कोशी अस्पतालका मेडिकल सुप्रिटेन्डेन्ट चुमनलाल दासले बताए ।