धरान / कक्षा १२ को परीक्षामा उत्कृष्ट नतिजा ल्याउने विभिन्न विद्यालयका विद्यार्थीहरूलाई धरान–१२ चतरलाइनस्थित मेघा कलेजले सम्मान गरेको छ ।
कलेजले शनिबार एक कार्यक्रमको आयोजना गरी उनीहरूलाई सम्मान गरेको हो । मेघा कलेजले धरान उपमहानगरभित्रका ६ वटा विद्यालयका ६ जना विद्यार्थीहरूलाई खदा र उपहारसहित सम्मान गरेको हो । विद्यार्थीहरूलाई प्रोत्साहनका लागि सम्मान गरिएको हिमालयन मेघा कलेजका अध्यक्ष कैलाश लिम्बूले जानकारी दिए ।
सम्मानित हुने विद्यार्थीहरूमा चिराग श्रेष्ठ, मेनुका दर्जी, सपना चाम्लिङ, सदीक्षा गुरागाईं, डम्बरकुमारी खत्री र ज्योति सोनाका छन् । उनीहरू आफ्नो विद्यालयका उत्कृष्ट विद्यार्थी हुन् । कार्यक्रममा कलेजका बीबीएस कोअर्डिनेटर चन्द्र वनेम, एकेडेमी डाइरेक्टर अर्जुन घिमिरे, फाउन्डर मेम्बर दीपेन्द्र यादव, जीवन न्यौपानेलगायत अन्य विद्यार्थीहरूको उपस्थिति थियो ।
कलेजले बीबीएस पहिलो वर्षका लागि शनिबार नै पहिलो चरणको प्रवेश परीक्षा पनि सम्पन्न गरेको छ ।व्यवस्थापन सङ्कायमा प्लस टु उत्तीर्ण गरिसकेका विद्यार्थीहरूलाई बीबीएस पहिलो वर्षमा नयाँ भर्नाका लागि लिइएको प्रवेश परीक्षामा १ सय ५० जनाभन्दा बढी विद्यार्थीहरू सहभागी भएको कलेजका शैक्षिक निर्देशक अर्जुन घिमिरेले जानकारी दिए । छुटेका अन्य विद्यार्थीहरूका लागि पनि चाँडै दोस्रो चरणको प्रवेश परीक्षा राखिने उनले बताए ।