आन्दोलनबाटै संसद् पुनःस्थापित हुन्छ : भट्टराई

इलाम : नेपाल कम्युनिस्ट पार्टी (नेकपा) का नेता योगेश भट्टराईले आन्दोलनबाटै प्रतिनिधिसभा पुनःस्थापना हुने धारणा राखेका छन् ।

यहाँ नेकपा (प्रचण्ड-नेपाल समूह) का कार्यकर्तासँगको भेटघाट कार्यक्रममा उनले बिहीबार यस्तो बताएका हुन् । संविधान बचाउनकै लागि एकपटक कडा आन्दोलन गर्नुपर्ने बताउँदै उनले सबै कार्यकर्तालार्ई कडा रूपले आन्दोलनमा सहभागी हुन आग्रह गरे ।

भट्टराईले भने, ‘आन्दोलनबाटै आगामी फागुन १५ गतेसम्ममा प्रतिनिधिसभा पुनःस्थापित हुन्छ ।’
संविधानमा हुँदै नभएको बाटो गएर प्रधानमन्त्रीले स्वेच्छाचारी प्रवृत्ति देखाएको उनको आरोप छ ।

नेता भट्टराईले जनताको बहुदलीय जनवाद (जबज) लाई प्रधानमन्त्रीले नै कुल्चिएको आरोप लगाए । पार्टीले असहयोग गरेको भन्ने प्रधानमन्त्रीको भनाइ गलत भएको उनको भनाइ छ ।

संसद्मा पेश गरिएका नीति, कार्यक्रम र बजेट फरक मतसमेत नराखी पारित गरेको उल्लेख गर्दै नेता भट्टराईले भने, ‘प्रधानमन्त्रीले पार्टीले असहयोग ग¥यो भन्नु गलत हो ।’

दुवै पार्टी (एमाले(माओवादी) बीचको सैद्धान्तिक र व्यावहारिक सहमतिपछि पार्टी एकता सम्भव भएको र एकताकै कारण दुई तिहाइको सरकार बनेको जिकीर गर्दै उनले थपे, ‘तर प्रधानमन्त्रीले प्रतिनिधिसभा विघटन गरेर देशलाई सङ्कटमा लैजान खोजे पनि यसलाई आन्दोलनबाटै बचाउनुपर्छ ।’