विराटनगर । प्रदेश १ का मुख्यमन्त्री शेरधन राईले आर्थिक ममिला तथा योजना मन्त्रालयको जिम्मेवारी आफै सम्हालेका छन ।
आर्थिक मामिला तथा योजना मन्त्री इन्द्रबहादुर आङ्बोले आफूविरुद्ध अविश्वास प्रस्ताव ल्याउन हस्ताक्षर अभियान चलाएपछि पदमुक्त गरिदिएका राईले विहीबार मन्त्रालय पुगी पदभार ग्रहण गरेका हुन । त्यस अवसरमा राईले प्रदेश संरचना संघीयताको मुटु भएको भन्दै यसलाई दोश्रो वर्षको अन्त्यदेखि यसको संचालनमा समस्या देखिदै गएको आफुले पाएको बताए ।
भने,“चालु आर्थिक वर्षको बजेट प्रस्तुत भएर पारित भईसकेपछि मुटु क्रोनिक अवस्थामा पुगेको थाहा भयो ।” प्रदेशको बजेट दुर्घटनाबाट अघि बढेको र समस्या पहिचान भएकाले उपचारको प्रक्रिया शुरु भईसकेको मुख्यमन्त्री राईको भनाई छ । उनले मन्त्रालयका सचिवले चिकित्सकको भूमिका निर्वाह गरिरहेको क्रोनिक अवस्थामा पु¥याइएको मन्त्रालयलाई पूवर्वत रुपमा संचालन गरिने बताए ।
आर्थिक मामिला मन्त्रालय कस्का कारण यो अवस्थामा आइपुग्यो भन्ने सबै जानकारी आफुले प्राप्त गरेको राईले जिकिर गरे ।
प्रदेश सरकारले सही र यथार्र्थपरक बजेट बनाउन नसकेको र वित्तीय अनुशासन कायम नभएकोबारे विभागीय मन्त्रीलाई पटक–पटक सचेत गराएको बताउँदै भने,“मन्त्रालयमा देखिएको बेथितिलाई पूर्णरुपमा निर्मुल गर्न निर्देशन दिएको छु ।
प्रणालीको विकास हुन नसक्दा मुलुकको दिगो र व्यवस्थित विकास हुन सकेका छैन ।” उनले प्रदेशमा प्रणालीको विकास गरी अनुसन्धानमा आधारित विकास कार्यअघि बढाईने बताए ।
प्रदेशमा बढेको घटनाक्रमबाट भ्रममा नपर्न भन्दै उनले आगामी माघ ७ गतेको प्रदेशसभापछि अन्यौलता हट्ने बताए । भने,“सरकार परिवर्तन हुने हल्लाको पछि लाग्नुपर्ने अवस्था छैन ।
कोही, कतै र कसैबाट पनि प्रभावित नहुनुहोला ।” उनले उच्च मनोवलका साथ काम गर्न कर्मचारीहरुलाई निर्देशन दिए । आर्थिक मन्त्रालयको नेतृत्व अब ठिक ढंगबाट हुने बताए ।