धरान । जुवा जन्य खेलहरुमा प्रहरीको नियन्त्रण तिब्र रुपमा बढेको छ । चाडपर्वको समयमा हुने जुवाजन्य खेलहरुलाई नियन्त्रण गर्न प्रदेश १ प्रहरीले अभियान नै चलाएको छ ।
यसै बिच मोरङको रतुवामाई नगरपालिका ८ बाट तास तथा जुवा खेलिरहेका अवस्थामा डेढ लाख भन्दा बढी नगद सहित १६ जनालाई पक्राउ गरेको छ ।
शुक्रवार राती साँढे ११ बजे स्थानीय सागर गडतौलाको घरमा जुवा तास खेलिरहेको भन्ने बिषेश सूचनाका आधारमा जिल्ला प्रहरी कार्यालय मोरङबाट खटिएको प्रहरी टोलीले उनीहरुलाई पक्राउ गरेको हो ।
पक्राउ पर्नेहरुमा रतुवामाईका डिल्लीराम चौलागाई, मोती पौडेल, रामनाथ मैनाली, देवी प्रसाद प्रसाई, रामनाथ नेपाल, हेमलाल प्रसाई, नारायण चुडाल, सन्त बहादुर राई, सागर गडतौला, दिपक ढुङगाना, योगराज घिमिरे, अशोक भट्टराई, राजन हस्ता सतार, गोपी पराजुली, रबिन पोखरेल र बेलबारीका गणेश श्रेष्ठ रहेका छन् ।
उनीहरुको साथबाट नगद १ लाख ६९ हजार ६ सय ९५ रुपैयाँ सहित १६ थान कौडा गोटी, एक बुङ तास, मोबाइल १६ थान, मोटरसाईकल १९ वटा र २ वटा कार पनि प्रहरीले नियन्त्रणमा लिएको छ ।
पक्राउ परेकाहरुको सम्बन्धमा थप अनुसन्धान भईरहेको जिल्ला प्रहरी कार्यालय मोरङले जनाएको छ ।
