घरमै पोखरी बनाएर अस्ताउँदै सुर्यलाई पानी चढाएर मनाइयो छठ पुजा

धरान । खोला किनारमा अस्ताउँदै सुर्यलाई अर्घ दिएर गरिने छठ पुजा कोरोना संक्रमणका कारण यस वर्ष केही धर्मावलम्बीहरुले घर मै मनाएका छन् भने केहीले नजिकैको पोखरीमा पुजा आजा गरेका छन् । कसैले खेतबारीमा पानीको पोखरी बनाएर छठ पर्व मनाएका छन् ।

कोरोना भाइरस र यसको त्रास संसंगै धार्मिक गतिविधि नगर्न स्थानीय प्रशासनले आग्रह गरेपछि घरमै खाल्डो खनि पानिले भरेर खोलाझै रंगाई बिधिवत रुपमा ब्रत बसेर पर्व मनाएका छन् । कोरोना भाइरसका कारण खोलामा जादाँ भिड भएकाले यहि पुजा गरेको धर्मावलम्बीहरुको भनाई छ ।

विगतका वर्षहरुमा धुमधामका साथ विभिन्न खोला, नदिका किनारहरुमा भिड लाग्ने गरेको थियो । १ हप्ता अघि देखिनै खोला किनाराहरुमा झिलीमिली बनाइन्थ्यो तर यस वर्ष केही हुन पाएन् ।

पछिल्लो समय तराई, पहाडी समुदायले पनि छठ पर्व मनाउन थाले पछि स्थानीय सरकारले नै पुजा व्यवस्थापन गरिदिन थालेको थियो । कोरोनाका कारण आफ्नो घर नजिकै पुजा गरी जोखिमबाट बच्न समेत सरकारले अनुरोध गरे पनि घर घरमै तथा घर नजिकै मनाइएको छ । कात्तिक शुक्ल चतुर्थीदेखि सप्तमी तिथिसम्म चार दिन छठ मनाइन्छ ।

छठ पर्वको पहिलो दिन अर्थात चतुर्थी तिथिको दिन नुहाएर चोखो भई खाने (नहाय खाय), पञ्चमी तिथिका दिन खरना, तेस्रो अर्थात षष्ठी तिथिका दिन आज (शुक्रबार) अस्ताउँदो सुर्यलाई अर्घ दिएर मनाइएको हो ।
छठमा शक्तिको स्रोत सूर्यको उपासना गर्ने गरिन्छ ।
भोलि अर्थात चौथो तथा अन्तिम दिन उदाउँदो सूर्यलाई अर्घ दिएपछि छठ विधिवत रुपमा समापन गरिन्छ ।

कोरोनाभाइरस महामारीका कारण तलाउ तथा नदी किनारामा भेला हुन भने जिल्ला प्रशासन कार्यालयहरूले रोक लगाएका छन्।नदी तथा तलाउमा गत वर्षहरूमा जस्तो भिड छैन। तर केही ठाउँका तलाउ भने सिंगारिएका छन् ।अधिकांश मानिस घरघरमै छठ मनाउँदैछन्।

धार्मिक विश्वास अनुसार छठको वर्त बस्नाले छाला सम्बन्धी रोग नलाग्ने विश्वास रहेको पाइन्छ ।यस पर्वमा केरा, स्याउ, उखु, सुन्तला, नरिवल, कागती, ठेकुवा, भुसवा, खाजा, लड्डु, बताशासहितका सामग्री बनाई सूर्य देवतालाई चढाउने गरिन्छ।

 माटा र बाँसले बनाइएका चंगेरा, कनसुप्ति, ढकना, सर्वासहितका कलात्मक भाडामा अर्घ राखेर सूर्य देवतालाई अर्पण गर्ने गरिन्छ।