विराटनगर । प्रदेश सरकारलाई घर आँगनकै सरकार भनिन्छ । विकासप्रति जनताको अपेक्षा यही सरकारसंग धेरै छ । अझ प्रदेश १ सरकारले त विकास र कृषि क्षेत्रलाई ठूलो प्राथमिकता दिएको छ । तर सरकारले कृषिसंग सम्बन्धित एउटा संरचना नै संचालन गर्न सकेको छैन ।
आफ्नै संरचना समेत सही ढंगबाट परिचालन गर्न नसक्दा प्रदेश सरकार अधिक आलोचनाको सिकार भएको छ । संघीय सरकारले हस्तान्तरण गरेको कृषि थोक बजारको संरचना चुस्त ढंगले संचालन गर्न प्रदेश १ सरकारले स्थानीय तहहरुलाई समेत विश्वासमा लिन सकेन । फलतः प्रधानमन्त्री केपी शर्मा ओली आंफै विराटनगरमा आएर हस्तान्तरण गरेको कृषि थोक बजारलाई झारले छोपेको छ ।
प्रदेश सरकारले विराटनगर महानगरपालिका र कटहरी गाउँपालिकालाई समेत विश्वासमा लिन सकेन ।
अहिले दोस्रो पटक संचालन कार्यविधि बनाएर नेकपा निकटका सहकारी संचालकलाई कृषि थोक बजारलाई जिम्मा लगाईएको छ । विराटनगर महानगर र कटहरी गापाले थोक बजारमा आफ्नो सहभागिता नभएको भन्दै चासो दिएनन् । विराटनगरले मुख्य बजारबाट तरकारीको गुदरी बजार उठाएन बरु व्यवसायी आफैंले जग्गा भाडामा लिएर नयाँ कृषि थोक बजार विराटनगरको जनपथ टोलमा नयाँ ढंगले संचालन गरेका छन । तर प्रदेशको महेशपुरमा अवस्थित संरचनामा न व्यापारिक गतिविधि छ न किसान नै पुग्छन । खरिद गर्ने ग्राहक र बिक्री गर्ने व्यापारी अनि उत्पादन गर्ने कृषकले प्रदेश सरकारलाई नपत्याएपछि कृषि बजार असफल बनेको छ ।