धरान । कोरोना महामारीमा पनि फ्रन्टलाईनमा बसेर काम गरिरहेका धरान स्थित वीपी कोइराला स्वास्थ्य विज्ञान प्रतिष्ठानका जुनियर रेसिडेन्ट चिकित्सकहरुको आन्दोलनका मागहरु प्रति व्यवस्थापनले वेवास्था गरेको भन्दै बुधबार देखि कोरोना सम्बन्धित ड्युटी समेत बहिष्कार गर्ने घोषणा गरेका छन् ।
जुनियर रेसिडेन्ट वेलफेयर सोसाइटीले मंगलबार विज्ञप्ती जारी गर्दै पदाधिकारीहरु क्वारेन्टाइन बस्नु परेको बहानामा प्रतिष्ठान प्रशासनले वार्ताको लागि कुनै चासो र तदारुकता नदेखाएको जनाएको छ । उनीहरुले भर्चुअल माध्यम भिडियो कन्फेरेन्स मार्फत जिम्मेवार पदाधिकारीबाट मागहरुको यथाशिघ्र सम्बोधन र कार्यान्यवन गर्दै काममा फर्कने वातावरण शिर्जना गर्न माग गरेका छन् । २४ घण्टा भित्र माग पुरा नभए आन्दोलनलाई थप सशक्त बनाउन बुधबार दिउँसो २ बजे देखि कोभिड सम्बन्धित सम्पुर्ण ड्युटी समेत बहिस्कार गर्ने घोषणा गरेका छन् ।
जुनियर रेसिडेन्ट चिकित्सकहरु सोमबार देखि सेवा सुविधाको माग गर्दै आन्दोलनमा रहेका छन् । कोरोना महामारीमा सुरक्षाको व्यवस्थापन, गुणस्तरिय खानाको व्यवस्था, संक्रमितहरुलाई क्वारेन्टाइनको व्यवस्थापन, सरकारको मापदण्ड अनुसारको ड्युटी समयको माग गर्दै उपकुलपति कार्यालय अघि धर्नामा बस्दै आएको छ ।
यता प्रतिष्ठानका पदाधिकारीहरु सोमबार उपकुलपतिमा कोरोना संक्रमण पुष्टि भए पछि क्वारेन्टाइनमा बसेका छन् ।