सुनसरी । कोशी गाउँपालिका वडा नम्बर २ पश्चिम कुशाहामा भएको दुई पक्षको झडपको विषयमा प्रहरीले जाहेरी दर्ता गर्न नमानेको पीडित पक्षले गुनासो गरेका छन् ।
भदौ २५ गते राती कोशी गाउँपालिका वडा नम्बर २ पश्चिम कुशाहामा तिलक यादव र मनोज यादव सहितको समूह र जागेश्वर यादव समूहको बीचमा भएको झडपमा जागेश्वर समूहका तीन जना घाईते भएको र ज्यान मार्ने उद्देश्यले आक्रमण भएको भन्दै कर्तव्य ज्यान उद्योगमा जिल्ला प्रहरी कार्यालय सुनसरीमा शुक्रबार किटानी जाहेरी दिएकोमा दर्ता गर्न नमानेको पीडित पक्षले शनिबार पत्रकार सम्मेलन गरी गुनासो गरेका हुन् ।
पीडित पक्षका विरेन्द्र यादवका अनुसार कोशी गाउँपालिका वडा नम्बर २ पश्चिम कुशाहाको भाडाहा टोलका ५० वर्षिय सत्रुधन यादव, २५ वर्षिय महेश यादव, ३० वर्षिय सञ्जय यादव, ५० वर्षिय तिलक यादव र ४५ वर्षिय मनोज यादवले ५३ वर्षिय हरीलाल यादव सहितका लाई ज्यान मार्ने उदेश्यले कसुर गरेका छन् ।
पीडकहरुले कसुर गरेको भन्दै पीडित पक्षले जाहेरी दिएकोमा प्रहरीले आफूहरुलाई बेवास्ता गरी उल्टै मिल्न दबाब दिएको यादवको भनाई छ । विपक्षीहरुले घरमा राखेको प्रदेश १–०२– ००१ ख ८१५६ नम्बरको ट्रकमा तोडफोड गरि घरमा रहेको टीभीको एलसिडी समेत फुटाएर ज्यान मार्ने उद्देश्यले योगेन्द्र यादव, उपेन्द्र यादव र तुलियादेवी यादव सहितलाई लाठी सहित घरेलु हतियारले आक्रमण गरेर घाईतेले दावी गरेका छन् ।
घाईतेहरुको टाउको, हात र शरिरको विभिन्न भागमा निलडाम र काटिएको छ । घाईतेहरुको उपचार विराटनगरको गोल्डेन र न्युरो अस्पतालमा भईहरेको पीडित प्रक्षको भनाई छ । उता तिलक यादव पक्षका भाई मनोज यादवले आफू घटनामा संल्गन नभएको र घरायसी कुरामा मुछन खोजेको प्रतिकृया दिनुभयो । मनोजले आफू घटना नभएको र उनीहरुले नै आक्रमण गरी दुई जना आफ्नो मान्छेलाई घाईते बनाको र आफ्नो गाडीमा समेत ढुगांमुडा गरेको दावी गर्नुभयो । यता जिल्ला प्रहरी कार्यालय सुनसरीका प्रहरी उपरीक्षक कमल थापा र मुद्धा शाखाका प्रहरी निरीक्षक सरोज खनालले पटक पटक फोन गर्दा सम्पर्क हुन सकेन ।
इलाका प्रहरी कार्यालय लौकहीका प्रहरी सहायक निरीक्षक रत्न पौडेलले भने घटना भएको पुष्टी गर्दै दुवै पक्षका गरि पाँच जना घाईते भएको र उनीहरुको उपचार विराटनगरमा भईहरेको प्रतिकृया दिएका छन् ।