मोरङको बुढीगंगामा एउटै उद्योगमा कार्यरत ३० मजदुरमा कोराना

विराटनगर । सुनसरी–मोरङ औद्योगिक करिडोरका एउटा उद्योगमा कार्यरत ३० जना मजदुरमा एकै पटक कोरोना संक्रमण देखिएको छ ।

मोरङको बुडीगंगा गाउँपालिका वडा नम्बर १ मा संचालित आरती आरती स्ट्रिप्स प्रा.लि.मा कार्यरत मजदुरहरुमा कोरोना संक्रमण पुष्टि भएको हो । यो उद्योग भारतीय लगानीको हो । यहाँ अधिकांश कामदार भारतीय नै छन् । बुढीगंगा गाउँपालिका विराटनगरको छिमेकी पालिका हो ।

पहिले दुई मजदुरमा कोरोना देखिएको थियो । पछि उपल्लास्तरका एक कर्मचारी र मजदुरसमेत ३० जनामा कोरोना संक्रमण पुष्टि भएको हो ।

बुढीगंगा गाउँपालिकाका अनुसार उद्योगमा कार्यरत डेढ सयभन्दा धेरैको स्वाब परीक्षण गरिएको थियो । हाल उद्योग शिल मजदुरलाई आइसोलेसनमा राखिएको छ । गाउँपालिकाले उद्योग शिल गर्न निर्देशन दिएको छ ।

बुढिगंगा २ का वडाध्यक्ष युवराज पौडेलले संक्रमण समुदायमा नफैलियोस भनेर सचेत रहन उद्योगलाई निर्देशन दिइएको बताए । आरतीमा कर्कट पाता र फलामे डण्डी उत्पादन हुन्छ ।

उद्योग संगठन मोरङका अध्यक्ष भीम घिमिरेले मजदुरमा संक्रमण त्रासले धेरै उद्योगले उत्पादन कटौती गरेको जानकारी दिए ।