मलामी गएका एक युवा आज दिउँसो तमोर नदीले बगाएर बेपत्ता

धनकुटा, २६ साउन ÷धनकुटाको चौबिसे गाउँपालिका–५ हंसमोरङमा मलामी गएका एक युवा आज दिउँसो तमोर नदीले बगाएर बेपत्ता भएका छन् ।

स्थानीय उत्तर बहादुर याखाको ३३ वर्षीय छोरा महेन्द्र याखा छिमेकीको मृत्यू भएपछि मलामी गएको समयमा नुहाउने क्रममा अचानक नदीले बगाएर बेपत्ता बनाएको जिल्ला प्रहरी कार्यालय धनकुटाका एसपी गोविन्द अधिकारीले बताए । चौबिसे गाउँपालिका–५ का वडाध्यक्ष पदमकुमार देवानको ८२ वर्षीय आमाको गएराति निधन भएपछि उनको आज दिउँसो त्रिवेणीघाटमा अत्येष्टि गरिएको थियो । उनको मलामी गएका ती युवा गर्मी भएपछि नुहाउने क्रममा उनलाई नदीले बगाएको थियो ।

तमोर नदीले याखालाई बगाएपछि अस्थायी प्रहरी पोष्ट मौनाबुधुक, मुलघाट प्रहरी चौकी, शसस्त्र प्रहरी बल बेस क्याम्प मुलघाट र स्थानीयवासीहरुले उनको खोजी कार्य जारी राखेका छन् । तथापी अहिले साँझ सम्म पनि उनको लास फेला पार्न नसकिएको एसपी अधिकारीले बताए । उनलाई चौबिसे–५ त्रिवेणीघाटबाट बगाएपछि साँगुरीगढीको याक्चनाघाट, मुलघाट लगायतका स्थानमा पनि खोजीको लागि प्रहरी परिचालन गरिएको प्रहरीले बताएको छ ।