पत्रकारको नवीकरण तथा नयाँ सदस्यता शुल्क छुट गर्न प्रेस संगठनको माग

 सुनसरी /  लकडाउनको कारण सञ्चारक्षेत्र प्रभावित भएको कारण नेपाल पत्रकार महासंघको सदस्यता शुल्क छुट गर्न प्रेस संगठन नेपाल सुनसरीले माग गरेको छ । संगठनले मंगलबार प्रेस बिज्ञप्ति जारी गर्दै नयाँ सदस्यता शुल्क र पुरानोको नवीकरण शुल्क छुट गर्न माग गरेको हो ।

कोभिड १९ को महामारीका कारण सञ्चार क्षेत्र प्रभावित हुँदा पत्रकारहरुले तलब सुबिधा समेत नपाएको अवस्थामा महासंघ सदस्यता नवीकरण र नयाँ सदस्यता शुल्क छुट गर्न माग गरेको हो । विभिन्न सञ्चार क्षेत्रमा कार्यरत पत्रकारहरु आर्थिक संकटमा रहेको उल्लेख गर्दै निःशुल्क सदस्यताको सुरुवात सुनसरीबाट गर्न माग गरिएको छ । संयोजक श्रीशीसा राई र सहसंयोजक शेखर ढकालद्वारा संयुक्त हस्ताक्षरीत विज्ञप्तीमा श्रमजिवी पत्रकारहरुलाई दैनिक जीवन सहज हुनेगरी विशेष पत्रकारिता राहत प्याकेज–०७७ घोषणाको लागि पहल गर्नसमेत माग गरिएको छ ।

बिज्ञप्तिमा लोककल्याणकारी विज्ञापनलाई व्यवस्थित तरिकाले वितरण गर्न, महामारीका कारण निष्कासित एवं सेवासुविधा कटौतिमा परेका श्रमजीविहरुको पुर्नवहाली गर्नसमेत माग गरिएको छ । सुनसरीबाट प्रकाशित हुँदै आएका १० वटा दैनिक, २७ वटा साप्ताहिक, १८ वटा एफएम, ४ वटा टेलिभिजन र २५ वटा अनलाईन न्युज पोर्टल सन्चालन मा रहेका छन् ।