कफी तथा एभोकाडोको व्यावसायिक खेती सुरु

धनकुटा / धनकुटाको पाख्रीवास नगरपालिका–८ मुगामा कफी तथा एभोकाडोको व्यावसायिक खेती सुरु गरिएको छ ।
सो क्षेत्रलाई कफी पकेट क्षेत्र घोषणा गरेर व्यवसायिक कफी तथा एभोकाडो खेती शुरु गरिएको हो । मुगा पाख्रीबास कृषि सहकारी सस्थाले एक कार्यक्रमका बीच व्यावसायिक खेती उद्घाटन गरेको छ । संघीय सांसद राजेन्द्र राईले कफी तथा एभोकाडोको बिरुवा रोपेर खेती उद्घाटन गरेका छन् । सो क्रममा पाख्रीबास नगरपालिकाका प्रमुख बिर्षबहादुर राई, मुगा कृषि सहकारीका अध्यक्ष रेवतबहादुर थापा लगायतले कफी र एभोकाडोको विरुवा रोपेका थिए ।

कार्यक्रममा संघीय सांसद राईले पाख्रीबास नगरपालिकालाई कृषि क्षेत्रमा अघि बढाउन पहल गर्ने बताउँदै पाख्रीवासलाई कफीको राजधानीको रुपमा विकास गर्न आफुले सक्दो सहयोग गर्ने प्रतिबद्धता व्यक्त गरे । पाख्रीवास नगरपालिकाका प्रमुख बिर्षबहादुर राईले पाख्रीबास नगरपालिकाका अधिकांस क्षेत्र कफी खेतीका लागि उपयुक्त रहेकाले नगरपालिकाले कफी पकेट क्षेत्र घोषणा गर्ने तयारी गरी रहेको बताए ।

मुगा पाख्रीवास कृषि सहकारी संस्थाले मुगाको ५ सय रोपनी क्षेत्रमा एभोकाडोका ३ हजार र कफीका ६ हजार बिरुवा रोप्ने तयारी गरेको संस्थाका अध्यक्ष रेवतबहादुर थापाले बताए । पाख्रीवास नगरपालिका जिल्लाको कृषि र पर्यटकिय क्षेत्रको हिसाबले अग्रणी स्थानमा रहेको छ । त्यसैले पाख्रीवासमा दुई वर्ष अगाडीदेखि कृषि क्याम्पसमा पनि संचालन भईरहेको छ ।

बक्रकुण्ड पञ्चेश्वर महादेव मन्दिर परिसरमा शेष नागको मूर्ति राखिएको छ

धनकुटाको हिले बजार नजिक रहेको बक्रकुण्ड पञ्चेश्वर महादेव मन्दिर परिसरमा शेष नागको मूर्ति राखिएको छ ।

नाग पञ्चमीको अवसर पारेर एक कार्यक्रमका बीच नागको मूर्ति अनावरण गरिएको हो । धनकुटा नगरपालिकाका मेयर चिन्तन तामाङ्ग र हिलेस्थित २ नं. बाहिनीका बाहिनीपति यमकुमार ढकालले मूर्तिको संयुक्त रुपमा अनावरण गरेका छन् । २ लाख ७ हजार बराबरको लागतमा मूर्ति निर्माण गरिएको हो । करिब ११ बर्ष अगाडी नाग देखा परेपछि मन्दिरको रुपमा विकास गरिएको सो क्षेत्र अहिले धार्मिक पर्यटकीय क्षेत्रको रुपमा बिकास हुदै गएको छ ।