_1693980289.gif "#")
धरान / पहाडी क्षेत्रमा निरन्तर वर्षा भए सँगै सप्तकोशी नदीको बहाव यस वर्षकै उच्च मापन गरिएको छ । बहाव बढे सँगै खतराको संकेत पनि पार गरेको छ ।
सप्तकोशीको बहाव बिहान ८ बजेको मापन अनुसार ३ लाख ४२ हजार ९ सय ७० मापन गरिएको छ । सप्तकोशीको बहाव क्षमता भन्दा दोब्बरले वृद्धि भए पनि अहिले ५० वटा ढोका खुल्ला गरिएको छ । कोशीमा डेढ लाख क्युसेक पानीको बहाव पुग्दा खतराको सुचक स्वरूप रातो बत्ती बाल्ने गरिन्छ ।
ब्यारेजका दुईवटै नहर बन्द गरिएको छ । पानीको बहाव थेग्न नसकेर नहर भत्किन सक्ने भएकाले नहर बन्द गरिएको हो । जल तथा मौसम विज्ञान विभागको बाढी सूचना केन्द्रले सप्तकोशीमा बहाव बढ्दो क्रममा रहेको जनाएको छ ।
त्यसैले सुनसरी र सप्तरी जिल्लाका तटीय क्षेत्रमा बुधबार विहानसम्म उच्च सतर्कतासाथ रहन वा सुरक्षित स्थानमा जान सूचित गरेको छ । स्थानीय प्रशासनले जोखिम क्षेत्रका बासिन्दालाई सतर्क रहन सूचना प्रवाह गरेको छ ।
सुनसरीका प्रमुख जिल्ला अधिकारी फडिन्द्रमणी पोख्रेलका अनुसार हरेक दिन विपतको बैठक बसेर सप्तकोशीले पुर्याउन सक्ने क्षतीको बारेमा पूर्वतयारी गरिन्छ भने सुरक्षा निकायमा सेना, शसस्त्र र प्रहरीलाइ तैनाथी अवस्थामा रहन भनिन्छ । आवश्यक सुरक्षा सामाग्रीको बारेमा सँघ र प्रदेश सरकारसँग समन्वय गरिएको छ ।
