_1693980289.gif "#")
धरान । लकडाउनको समयमा पनि विकाश निर्माण कामले तिब्रता पाइरहँदा धरान १५ स्थित खोरिया बस्ती पुर्व सेउती खोलामा बन्दै गरेको पुल भने अलपत्र बनेको छ ।
ठेकेदार कम्पनी लकडाउनको बहाना देखाएर पुलको कामलाई बिचमै अलपत्र पारेर हराएका छन् । धरान ५ मा पर्ने अधेरी खोलामा ठेकेदार सम्पर्कविहिन हुँदा ३ बर्षअघि निर्माण शुरु भएको पुलको पिलर मात्र ठडिएका छन् । स्थानीयबासीहरु बर्षामा जोखिम मोलेर अधेरी खोला तर्न बाध्य छन् कि उनीहरु लामो बाटो तल्लो पानवारी हुदै यात्रा गर्न बाध्य छन् ।
पुल निर्माण समन्वय समितिका संयोजक पदम कार्कीका अनुसार इनरुवाका हजमुल मियाँले ठेक्का पाएर २०७४ सालदेखि निर्माण शुरु भएको हो । पहिलो सम्झौता अनुसार दुई बर्षभित्र अर्थात २०७६ असार २५ गतेभित्र निर्माण सम्पन्न गर्नुपर्ने थियो । तर, ३ बर्ष बितिसक्दा पनि निर्माण सकिएको छैन । पछिल्लो समय २०७७ असार २५ गतेसम्मको लागि म्याद थप भएपनि कुनै काम भएको छैन ।
पुल निर्माण नहुँदा यातायातको साधन, मानिसहरु आवतजावतमा असहज भइरहेको छ । कार्कीले भने, विद्यार्थीहरु स्कुल र बजार जान दैनिक समस्या भइरहेको छ,सुनसरी मोरङ पुल आयोजना, इटहरीमा गयौं, तर सुनुवाई नै भएको छैन । काम भएको छ छैन भनेर अनुगमन गर्ने र ठेकेदारलाई कारबाही गर्नुपर्ने हो, त्यो पनि भएन ।’
पुल संघीय सरकारको भौतिक योजना तथा निर्माण मन्त्रालयबाट विनियोजन भएको बजेटले निर्माण शुरु भएको हो । पुल साढे ७ करोडमा ठेक्का लागेको थियो । यसको लम्बाई १ सय २५ मिटर र चौडाई ११ मिटरको छ । ठेकेदारले पुल निर्माण गर्दा शुरुको बर्ष अधेरी खोलाबाट अवैधरुपमा उल्टै ढुंगागिट्टी निकालेर इनरुवातिर बिक्री गरेको मकुम राईले बताए । उनले भने, ‘यहाँ काम गरेजस्तो गरेर ढुंगागिटी इनरुवातिर लगेर बेच्यो । हामीले समातेर प्रहरीमा बुझायौं पनि, एक बर्षमा ८, १० वटा मोटरसाइकल बगाउछ, मान्छे पनि बगाउछ । ज्यादै दुःख भइरहेको छ ।’
ठेकेदार मियाँले भुक्तानी वापत दिएको चेक पनि बाउन्स भएको पाइएको छ । उनले ढुंगा आपूर्ति गरेवापत दिएको चेक बाउन्स भएको छ भने ज्यालादारीमा काम गर्नेहरुलाई अझै पैसा दिएका छैनन् ।
