कक्षा ११ को परीक्षा पनि आन्तरिक मुल्यांकनबाट नतिजा तयार गरिने

काठमाडौँ / विश्वब्यापी महामारीको रुपमा फैलिएको कोरोना भाइरसको कारण स्थगित भएको यस वर्षको कक्षा ११ को परिक्षा नहुने भएको छ । शिक्षा मन्त्री गिरिराजमणि पोखरेल अध्यक्षताको राष्ट्रिय पाठ्यक्रम विकास तथा मूल्याँकन परिषद्को शुक्रबार बसेको बैठकले विद्यार्थीलाई आन्तरिक मूल्याङ्कनका  आधारमा प्रमाण पत्र दिने निर्णय गरेको छ । 

आन्तरिक मूल्याङ्कन के कसरी गर्ने भन्ने विषयमा कार्यविधि बनाउन राष्ट्रिय परीक्षा बोर्डलाई जिम्मेवारी दिइएको छ ।

गत बेशाख २६ गते देखि हुने भनिएको कक्षा ११ को परीक्षा कोरोना जोखिमका कारण कोरोना रोकथाम तथा नियन्त्रण उच्चस्तरीय समन्वय समितिको निर्णयपछि स्थगित गरिएको थियो ।
बोर्डले कार्यविधि बनाएपछि सम्बन्धित विद्यालयले विद्यार्थीलाई अंक प्रदान गरिने भएको छ ।

असार मसान्तभित्र देशभरबाट बोर्डमा अंक प्राप्त भएपछि साउन १५ सम्म नतिजा सार्वजनिक गर्ने लक्ष्य लिइएको छ ।
कक्षा १२ को विषयमा भने अहिलेसम्म कुनै पनि निर्णय भएको छैन ।