चौबिसे गाउँपालिका द्वारा काठमाडौंमा अलपत्र स्थानियको उद्दार

धनकुटा, ३ जेठ ÷ धनकुटाको चौबिसे गाउँपालिकाले लकडाउनको कारण काठमाडौंमा अलपत्र परेका सो गाउँपालिकाका ५३ जनालाई उद्दार गरी धनकुटा ल्याएको छ ।

सो गाउँपालिकाको विभिन्न वडाहरुका स्थायी वासी भई काठमाडौंमा उपचारको क्रममा गएका, अध्ययनको क्रममा रहेका र दैनिक ज्याला मजदुरी गर्दै आएका ५३ जनालाई गाउँपालिकाको खर्चमा गाडी रिजर्भ गरी गाउँपालिकाले काठमाडौंबाट उद्दार गरी गाउँपालिका ल्याएको हो ।

विश्वव्यापी रुपमा महामारीको रुपमा फैलिएको कोरोना भाइरस (कोभिड–१९) को संक्रमणलाई रोक्न सरकारले ५३ औं दिन देखि गरेको निरन्तरको लकडाउनका कारण काठमाडौंमा अलपत्र परेका गाउँपालिकाबासीहरुलाई संघीय सांसद राजेन्द्र कुमार राईको पहलमा पहलमा उद्दार गरी ल्याएको गाउँपालिकाका अध्यक्ष खजिन्द्र राईले बताए ।

काठमाडौंबाट उद्दार गरी बसमा आएका चौबिसेवासीहरुलाई चौविसे गाउँपालिकाका अध्यक्ष खजिन्द्र राई, उपाध्यक्ष यज्ञकुमारी रुचाल, प्रमुख प्रशासकिय अधिकृत शशि राई लगायतले चौबिसे गाउँपालिका–६ राजारानीमा स्वागत गरेका थिए ।

उनीहरुलाई गाउँपालिकाले चौबिसेको रानीताल फलैचामा सामुहिक खाना समेत खुवाएको थियो । त्यस पश्चात् उनीको स्वास्थ्य चेक जाँच गराई १४ दिनसम्म होम क्वारेनटाइनमा राख्ने सर्तमा सम्बन्धित वडाका वडाध्यक्षहरुलाई जिम्मा लगाएको गाउँपालिकाले जनाएको छ ।

उद्दार गरी ल्याइएकाहरु सबैको स्वास्थ्य अवस्था सामान्य रहेको स्वास्थ्य शाखा चौबिसेका प्रमुख मेघराज वनले बताए ।