लकडाउन उल्लंघन गर्दै छिमेकी मुलुक भारतबाट मानिस नेपाल तर्फ पस्न थालेपछि उनीहरुलाई नियन्त्रण गर्न सिमा सुरक्षा पोष्टका शसस्त्र प्रहरीले गोली चलाउनु परेको छ ।
झापा गाउँपालिकाको वडा नम्वर ४ को जङे पिलर १ सय ३१ नम्वर आसपासको सीमा सुरक्षा पोस्ट क्षेत्रबाट सिमा पारीबाट अज्ञात भारतीय समुहले हुल हुज्जत गरेको र प्रहरीले गोलि समेत चलाउनु परेको थियो ।
प्रहरीका अनुसार दुई जना भारतीय नागरिक भारतीय नम्बर प्लेटको मोटरसाइकल चढेर नेपाल छिर्न खोजेका थिए । कोरोना रोकथाम तथा नियन्त्रणका लागि सीमामा तैनाथ सुरक्षाकर्मीले उनीहरूलाई छिर्न नदिई सम्झाई बुझाई फिर्ता पठाएका थिए । फिर्ता गएका ती दुई भारतीय नागरिकले डेढ देखि दुई सय गाउँले भेला गरी पुनः सीमा क्षेत्रमा लिएर आएका थिए ।
घरेलु हातहतियार सहित आएका भारतीय नागरिकले नेपाल प्रवेश गरी सुरक्षा पोस्ट माथि आक्रमण गर्न खोज्दा सशस्त्र प्रहरीले हवाई फायर गरेको हो । सशस्त्रले हवाई फायर गरेपछि भारतीय नागरिक त्यहाँबाट भागेका थिए ।
गाउँपालिका अध्यक्ष जयनारायण शाहले घटनाप्रति गम्भीर ध्यान आकर्षण भएको उल्लेख गर्दै सिमा क्षेत्रमा भारतीय नागरिकबाट गरिएको यस्तो किसिमको गतिविधि निन्दनीय र खेदजनक भएको भन्दै भारतीय सुरक्षा निकाय र सरकारको तर्फबाट दुई देशीय हित र पारस्पारिक लाभको आधारमा पूर्ण नियन्त्रण गर्नको लागि जोड्दार माग गरेका छन् ।
अध्यक्ष शाहले गाउँपालिकाका जनताको समयमा नै जिउ धनको सुरक्षाको उचित व्यवस्था गर्नका साथै थप सुरक्षा प्रबन्ध मिलाउन झापा जिल्ला प्रशासन, सुरक्षा निकाय र नेपाल सरकारको समेत ध्यान आकर्षण गराएका छन् ।