१ नम्बर प्रदेश प्रहरी प्रमुख डिआइजी ईश्वर बाबु कार्कीले लकडाउन कार्यान्वयनमा कुनै पनि ‘कम्प्रमाईज’ नगर्न प्रहरीलाई निर्देशन दिएका छन् । भर्खरै प्रदेश प्रहरी प्रमुखको कमान्ड सम्हालेका कार्कीले बुधवार भिडियो कन्फ्रेन्स मार्फत मातहतका प्रहरी कमाण्डरलाई निर्देशन दिँदै लकडाउनमा सशक्त भएर प्रस्तुत हुन निर्देशन दिए ।
सरकारले निर्देशित कानुन भित्र रहेर फिल्डमा खटिएका प्रहरीलाई कसैको प्रेसरमा नआई उच्च मनोबलका साथ काम गर्न भनेका छन् । लकडाउन कार्यान्वयन गर्दा प्रहरीलाई आइपर्ने अनावश्यक ‘सोर्सफोर्स’ को पछि नलागी डिउटी गर्न स्पष्ट पारे ।
‘सवारी साधन वा मान्छे छुटाउनको लागि ‘कसैको’ पनि दबाब र प्रभावमा नपर्नुहोला’ उनले निर्देशन दिँदै भने ‘प्रहरीले गरेको कडाइ जनताकै हितको लागि हो भनेर सम्झाउनु होस’ । भिडियो कन्फ्रेन्सपछि एक प्रहरी अधिकृतले विश्वभर महामारीको रूपमा देखिएको कोरोना भाइरसको नियन्त्रणमा अन्य प्रदेश भन्दा प्रदेश १ मा प्रहरी गम्भीर भएर लाग्नु पर्ने डिआइजी साँपको धारणा रहेको अपराध न्युजलाई जानकारी दिए ।
उदयपुरको घटनापछि १ नम्बर प्रदेशमा कोरोना सङ्क्रमण अझ फैलिन नदिन ‘फ्रन्टलाईन’ मा खटिएका प्रहरीलाई सचेत एवम् कठोर भएर प्रस्तुत हुन निर्देशन दिएको ती प्रहरी अधिकृतको भनाई छ ।
स्वास्थ्य उपकरण बिना फिल्डमा खटिएका प्रहरीको जोखिम कम गर्न सीमित स्रोत साधनको उच्चतम प्रयोग गर्न पनि जिल्लाका प्रहरी कमाण्डरलाई निर्देशन दिइएको छ । साथै गाउँ घरमा महामारी रोगका बारेमा जनचेतना बढाउन पनि कार्कीले कन्फ्रेन्स मार्फत निर्देशन दिए ।
लकडाउन लम्बिँदै गएको अवस्थामा आइपर्ने अपराधका चुनौतीसँग सामान गर्न जिल्लागत कार्य योजना बनाइ तयारी अवस्थामा रहन पनि भनिएको छ ।
डिआइजी कार्कीले महामारीको विषम परिस्थितिमा बजारमा कालोबजारी र कृत्रिम अभाव गर्नेलाई कानुनी दायरामा ल्याउन समेत निर्देशन दिए ।
यस्तै सीमावर्ती क्षेत्रहरूबाट हुन सक्ने चोरी पैठारीलाई रोक्न सीमावर्ती क्षेत्रहरूमा विशेष ध्यान दिई काम गर्न र क्वारेन्टाइन स्थलहरूमा भरपर्दो सुरक्षा व्यवस्था मिलाउन जिल्ला प्रहरी प्रमुखलाई निर्देशन दिइएको छ ।