धरान/ धनकुटाको साँगुरीगढी गाउँपालिका–६ भेडेटारमा स्कार्पियो दुर्घटना हुँदा ठूलो परिमाणमा गाँजा बरामद भएको छ। घटनामा धरान–१० बस्ने ३९ वर्षीय अमित विश्वकर्मालाई प्रहरीले नियन्त्रणमा लिएको छ।
मंगलबार राति करिब ११ः५५ बजे ढुङ्गेबाट भेडेटारतर्फ आउँदै गरेको बा १३ च ६२७५ नम्बरको स्कार्पियो भेडेटारस्थित स्काईवाक नजिकैको भित्री सडकबाट करिब १५ मिटर तल खसेर दुर्घटना भएको थियो।
दुर्घटनाको सूचना पाएपछि इलाका प्रहरी कार्यालय भेडेटारबाट प्रहरी नायब निरीक्षक भीमबहादुर श्रेष्ठको कमाण्डमा टोली घटनास्थल पुगेको थियो। प्रहरीले दुर्घटनाग्रस्त स्कार्पियोभित्र बोरामा प्याक गरेर राखिएको ३४१ किलोग्राम गाँजा बरामद गरेको जनाएको छ।
दुर्घटनास्थल आसपास शंकास्पद अवस्थामा भेटिएका अमित विश्वकर्मालाई प्रहरीले नियन्त्रणमा लिएर जिल्ला प्रहरी कार्यालय धनकुटा ल्याएको छ।
विश्वकर्मा मोरङको विराटनगर महानगरपालिका–९ का स्थायी बासिन्दा भए पनि हाल धरान उपमहानगरपालिका–१० मा बस्दै आएको प्रहरीले जनाएको छ।
बरामद गाँजा र स्कार्पियोसहित विश्वकर्मामाथि थप अनुसन्धान भइरहेको जिल्ला प्रहरी कार्यालय धनकुटाले जनाएको छ।
