मेघा हिमालयनका सुहाना र सेनिहाङ मिस र ‘मिस्टर फ्रेसर’
- असोज ३, २०८३
- कोशीपत्र/संवाददाता
धरान/ धरान मेघा हिमालयन स्कुल/कलेजमा कक्षा-११ मा अध्ययन गर्न आएका नवआगन्तुक विद्यार्थीहरूका लागि आयोजित स्वागत कार्यक्रममा सुहाना लिम्बू ‘मिस फ्रेसर’ र सेनिहाङ राई ‘मिस्टर फ्रेसर’ घोषित भएका छन्।
धरान-१५ स्थित चुम्लुङ भवनमा शुक्रवार आयोजित कार्यक्रममा सुहानालाई ‘मिस प्रोभिन्स आइडल-२०२५’ की विजेता स्वर्णिम थापामगरले क्राउन लगाइदिएकी थिइन्। ‘मिस स्टेट-२०२१’ की विजेता तथा कोरियोग्राफर स्वेता भुजेलले स्यास लगाइदिएकी थिइन्। कलेजका अध्यक्ष राजेश विद्रोही र प्रिन्सिपल दीपक घिमिरेले सुहानालाई फ्लावर बुके तथा ट्रफी प्रदान गरे।
त्यस्तै, ‘मिस्टर फ्रेसर’ सेनिहाङ राईलाई अध्यक्ष विद्रोही र प्रिन्सिपल घिमिरेले ढाका टोपी लगाइदिनुका साथै बुके, स्यास र ट्रफी प्रदान गरेका थिए।
कलेजले आन्तरिक रूपमा विद्यार्थीहरूको अध्ययनमा उत्कृष्टता, अनुशासन, सामाजिक भावना लगायतका विभिन्न पक्षलाई समग्र रूपमा मूल्यांकन गरी मिस फ्रेसर र मिस्टर फ्रेसर छनोट गरेको कलेजका निर्देशक अर्जुन घिमिरेले जानकारी दिए।
नवआगन्तुक विद्यार्थीलाई कलेजको वातावरणसँग परिचित गराउने तथा उनीहरूको प्रतिभा र व्यक्तित्वलाई प्रोत्साहन गर्ने उद्देश्यले स्वागत कार्यक्रम आयोजना गरिएको कलेजले जनाएको छ।
