धरान/ भोटेकोशीमा आएको विनाशकारी बाढीबाट प्रभावित बालबालिकाका लागि सुनसरीको धरान–१६ स्थित सिटी मन्टेश्वरी चिल्ड्रेन हाउस तथा ट्रेनिङ सेन्टरले राहत सामग्री सहयोग गरेको छ।
विद्यालयमा अध्ययनरत बालबालिका, शिक्षक तथा कर्मचारीबाट रकम संकलन गरी बाढीपीडितका लागि आवश्यक लत्ताकपडा तथा अन्य सामग्री खरिद गरी सहयोग गरिएको हो।
विद्यालयले सञ्चालन गरेको अभियानबाट ४३ हजार ९ सय ४५ रुपैयाँ संकलन भएको थियो। सो रकमबाट ४७ जोर कपडा, २३ जोर भित्री कपडा, ४० वटा ऊनी टोपी, ५० जोर चप्पल र ६० जोर जुत्ता खरिद गरी राहतस्वरूप पठाइएको विद्यालयले जनाएको छ।
संकलित राहत सामग्री नेपाल स्काउट, कोशी प्रदेशका प्रदेश प्रमुख आयुक्त हेमन्त भण्डारीमार्फत बाढी प्रभावित क्षेत्रतर्फ हस्तान्तरण गरिएको हो।
हाल सिटी मन्टेश्वरीमा करिब ७० जना बालबालिका अध्ययनरत छन्। विद्यालयकी सञ्चालिका ओमकुमारी राईले विद्यार्थी, शिक्षक तथा कर्मचारीको सानो–सानो सहयोगबाट बाढीपीडित बालबालिकाका लागि राहत जुटाउन सकिएको बताइन्।
बाढीबाट ठूलो जनधनको क्षति भएका परिवारका बालबालिकालाई केही राहत पुगोस् भन्ने उद्देश्यले अभियान सञ्चालन गरिएको विद्यालय परिवारले जनाएको छ।
विद्यालयले सहयोग रकम सानो भए पनि त्यसमा रहेको माया, सद्भाव र मानवताको भावना ठूलो हुने जनाएको छ। विपद्को पीडामा रहेका बालबालिकाको आँसु पुछ्न र उनीहरूको जीवनमा आशाको किरण जगाउन आफ्नो सानो सहयोगले पनि महत्वपूर्ण भूमिका खेल्ने विद्यालयको विश्वास छ।
अभियान सफल बनाउन सहयोग गर्ने अभिभावक, विद्यार्थी, शिक्षक तथा कर्मचारीप्रति विद्यालय परिवारले आभार व्यक्त गरेको छ।
